सीमामा अब सादा टोली

काठमाडौं । गृहमन्त्री सुधन गुरुङले सीमा क्षेत्रको अनुगमनका लागि अब आफूभन्दा पनि सादा पोसाकमा खटिने विशेष टास्क फोर्स परिचालन गरिने बताएका छन् ।

राष्ट्रियसभा अन्तर्गतको संघीयता सबलीकरण तथा राष्ट्रिय सरोकार समितिको बैठकमा सांसदहरूले उठाएका प्रश्नको जवाफ दिँदै उनले सीमा नाकाको अनुगमनलाई प्रभावकारी बनाउन ‘मिनिस्ट्रियल स्पेशल टास्क फोर्स’ गठन गर्ने तयारी भइरहेको जानकारी दिए । उनले गृहमन्त्री स्वयं सीमा क्षेत्रमा पुग्दा सुरक्षा घेरा र भिडभाडका कारण वास्तविक अवस्था बुझ्न कठिन हुने तथा त्यसलाई कतिपयले ‘स्टन्ट’का रूपमा टिप्पणी गर्ने गरेको उल्लेख गरे । त्यसैले अब सादा पोसाकमा खटिने टोलीले जनताको समस्या बुझ्ने र नियमित अनुगमन गर्ने उनको भनाइ छ ।

Advertisement

गुरुङले मधेश, कर्णाली र सुदूरपश्चिमलाई गृह मन्त्रालयको विशेष प्राथमिकतामा राखिएको पनि बताए । ती क्षेत्रमा लामो समयदेखि जनताको पीडा र अभावलाई राजनीतिक विषय बनाइएको उल्लेख गर्दै अब त्यसको अन्त्य गर्न सरकार प्रतिबद्ध रहेको उनले बताए ।

उनले ती प्रदेशका नागरिकले राज्यबाट अपेक्षित उपलब्धि महसुस गर्न नसकेको स्वीकार गर्दै सुरक्षा, सेवा प्रवाह र विकासका विषयमा विशेष ध्यान दिइने बताए । कुनै कमजोरी देखिए सुधार गर्दै अघि बढ्ने प्रतिबद्धता पनि उनले व्यक्त गरे ।