भिडियोसहित तीज गीत ल्याउँदै दर्पण कला संसार

झापा। झापाको गौरादहलाई कार्यक्षेत्र बनाएर कला तथा संस्कृतिको संरक्षणमा सक्रिय ‘दर्पण कला संसार’ले तीज गीतको छायाङ्कन सम्पन्न गरेको छ। स्थानीय महिला कलाकारहरूलाई प्राथमिकता दिँदै लागूऔषधविरुद्ध जनचेतनामूलक सन्देशसमेत समेटेर तीज गीत निर्माण गरिएको हो।

गौरादह नगरपालिका–१ स्थित मोक्षेश्वर शिवालय मन्दिर परिसरमा गौरादह–१ का वडाध्यक्ष नगेन्द्र भण्डारीको प्रमुख आतिथ्यता तथा उद्योग वाणिज्य सङ्घका अध्यक्ष ईश्वर खत्रीको विशिष्ट आतिथ्यतामा गीतको शुभमुहूर्त गरिएको थियो। कार्यक्रममा संस्थाका सल्लाहकार समिति सहसंयोजक टेकबहादुर कार्की, अध्यक्ष प्रेमलावतीलगायत स्थानीय सामाजिक व्यक्तित्वहरूको उपस्थिति रहेको थियो।

Advertisement

संस्थाको ब्यानरमा निर्मित गीतको रचना तथा निर्देशन हरि बस्नेत ‘डिके’ले गरेका हुन्। अशोक थापाको सङ्गीत रहेको गीतमा दीपा अधिकारीले गायनमा डेब्यु गरेकी छन् भने भुवन खड्का निर्माता रहेका छन्। जीवन थापा मगरले छायाङ्कन गरेको भिडियोको सम्पादन मुहारसिंह थापा मगरले गर्नेछन्।

भिडियोमा गङ्गा भट्टराई खड्का, इसु अधिकारी, रिंकु मण्डल, रश्मिता थापा, पूजा गौतम, कुमारी बस्नेत, मञ्जु पाठक, निर्मला रिमाल, दीपा अधिकारी र लक्ष्मी चिमरियालगायत स्थानीय महिला कलाकारहरूले अभिनय गरेका छन्। निर्माण टोलीका अनुसार भदौ पहिलो साता भिडियो युट्युबमार्फत सार्वजनिक गर्ने तयारी छ।