ड्रोन आक्रमणपछि विस्फोट, ३७ जनाको मृत्यु

एजेन्सी । युक्रेनी सेनाका लागि हतियार भण्डारण गरिएको किभनजिकैको एक गोदाममा रुसी ड्रोन आक्रमणपछि भएको शक्तिशाली विस्फोटमा कम्तीमा ३७ जनाको मृत्यु भएको छ । घटनामा ४२ जना घाइते भएका छन् भने करिब ४०० जनालाई सुरक्षित स्थानमा सारिएको जनाइएको छ ।

शुक्रबार राति आवासीय क्षेत्रनजिकै रहेको हतियार भण्डारमा ड्रोन आक्रमण भएपछि त्यहाँ राखिएका गोलाबारुद, बारुदी सुरुङ र ड्रोन विस्फोट भएका थिए । विस्फोटबाट आसपासका घर तथा संरचनामा ठूलो क्षति पुगेको राष्ट्रपति भोलोदिमिर जेलेन्स्कीले बताएका छन् । क्षतिग्रस्त संरचनामा वृद्धवृद्धा तथा अपाङ्गता भएका व्यक्तिको हेरचाह गर्ने केन्द्रसमेत रहेको उनले बताए ।

Advertisement

क्षेत्रीय प्रमुख तिमुर तकाचेन्कोका अनुसार घाइतेमध्ये चार जना बालबालिका छन् । बुखा जिल्लास्थित घटनास्थलमा शनिबार पनि खोज तथा उद्धार कार्य जारी थियो । जेलेन्स्कीले आवासीय क्षेत्रनजिकै हतियार तथा विस्फोटक पदार्थ भण्डारण गर्नु नै गलत भएको भन्दै घटनाबारे अनुसन्धान सुरु गरिएको बताएका छन् । उनले विस्फोटक पदार्थ बस्तीको छेउमा राख्ने कार्यमा गम्भीर लापरबाही भएको बताएका छन् ।

रुसको रक्षा मन्त्रालयले भने किभको पश्चिममा रहेको मायला गाउँको ‘गोला–बारुद भण्डार’ लाई निशाना बनाएको दाबी गरेको छ । उसका अनुसार त्यहाँ एफपी–१ र एफपी–२ नामका लामो दूरीका ड्रोनका पार्टपुर्जा तथा प्रक्षेपण बुस्टर राखिएका थिए । विस्फोटबाट गाउँका करिब १३० घरमा क्षति पुगेको छ । भण्डारबाट करिब २०० मिटर टाढाका केही घर पूर्ण रूपमा क्षतिग्रस्त भएका छन्। किभनजिकैको उक्त हतियार भण्डारमा पछिल्ला केही महिनामा भएको यो दोस्रो आक्रमण हो ।