चार टोलीबीच प्रतिष्ठाको लडाइँ, दुईवटा रोचक भिडन्त हुँदै

काठमाडौं । नेपाल प्रिमियर लिग (एनपीएल) अन्तर्गत बिहीबार दुई खेल हुँदैछन् । कीर्तिपुरस्थित त्रिवि क्रिकेट मैदानमा हुने खेलमा लुम्बिनी लायन्स, जनकपुर बोल्ट्स, विराटनगर किंग्स र काठमाडौं गोर्खाजले प्रतिस्पर्धा गर्नेछन् ।

चार टोलीबीचको प्रतिष्ठाको लडाइँले गर्दा दुईवटा रोचक भिडन्त हुन लागेका हुन् । पहिलो खेलमा दिउँसो १२ः३० बजे लुम्बिनी लायन्स र जनकपुर बोल्ट्सबीच भिडन्त हुनेछ । जारी प्रतियोगितामा उत्कृष्ट लयमा देखिएको लुम्बिनी अपराजित यात्रालाई कायम राख्ने लक्ष्यसहित मैदान उत्रनेछ ।

तीन खेल खेलेको लुम्बिनीले दुईमा जित र एक खेलमा अंक बाँड्दै पाँच अंक जोडेको छ । टोली अंक तालिकाको शीर्ष स्थानमा छ । यता जनकपुर भने जितको लय समात्दै अंक तालिकामा आफ्नो स्थिति सुधार्ने योजनामा हुनेछ । चार खेलबाट दुई जित र दुई हार बेहोरेको जनकपुर चार अंकसहित चौथो स्थानमा छ ।

बिहीबारको दोस्रो खेलमा साँझ ५ बजे विराटनगर किंग्स र काठमाडौं गोर्खाज आमनेसामने हुनेछन् । चार खेलबाट दुई जित र दुई हारको नतिजा निकालेको विराटनगर चार अंकसहित दोस्रो स्थानमा छ ।

काठमाडौंका लागि भने यो खेल अंक तालिकामा सुधार गर्ने अवसर हुनेछ । दुई खेल खेलेको काठमाडौंले एकमा जित र एकमा हार बेहोरेको छ । दुई अंकसहित टोली सातौं स्थानमा छ ।

दुवै खेलले टोलीहरूको अंक तालिकामा थपघट ल्याउने भएकाले बिहीबारको प्रतिस्पर्धालाई महत्त्वपूर्ण रूपमा हेरिएको छ ।