
काठमाडौं । साताको चौथो कारोबार दिन बुधबार धितोपत्र बजार १०.३० अंकले बढेको छ । यस वृद्धिसँगै नेप्से परिसूचक २६४८.९० विन्दुमा पुगेर रोकिएको छ । अघिल्लो दिन मंगलबार पनि बजार २१ अंकले बढेको थियो ।
कारोबार रकममा पनि अघिल्लो दिनको तुलनामा सामान्य सुधार देखिएको छ । मंगलबार ४ अर्ब २३ करोड रुपैयाँको सेयर किनबेच भएकोमा बुधबार ४ अर्ब ४५ करोड रुपैयाँ बराबरको कारोबार भएको छ । बजारमा कुल १५७ कम्पनीको सेयर मूल्य बढ्दा ९० कम्पनीको घटेको छ भने १३ कम्पनीको मूल्य स्थिर रह्यो ।
समूहगत परिसूचकतर्फ जीवन बीमा समूह सबैभन्दा धेरै १.७९ प्रतिशतले उकालो लागेको छ । यस्तै बैंकिङ ०.२२, विकास बैंक ०.२१, होटल तथा पर्यटन ०.४७, हाइड्रोपावर ०.३९, लगानी ०.३० र उत्पादन तथा प्रशोधन ०.८३ प्रतिशतले बढेका छन् । माइक्रोफाइनान्स, निर्जीवन बीमा र अन्य समूहमा पनि सामान्य सुधार देखिएको छ । यद्यपि, व्यापार समूह ०.८९ र फाइनान्स समूह ०.२८ प्रतिशतले घटेका छन् ।
आज साल्पा विकास बैंक र रिलायन्स स्पिनिङ मिल्सको सेयर मूल्यमा १० प्रतिशतको सकारात्मक सर्किट लागेको छ । विन नेपाल लघुवित्त र सुपरमाइ हाइड्रोपावरका लगानीकर्ताले पनि उल्लेख्य नाफा कमाएका छन् । अर्कोतर्फ, हिमालयन पावर पार्टनरको मूल्य ५.९८ प्रतिशतले घटेर सर्वाधिक गुमाउनेमा परेको छ । आज आँखुखोला जलविद्युत्, ङादी ग्रुप र एसवाई प्यानल लगायतका कम्पनीको धेरै कारोबार भयो ।

























