
काठमाडौं।। नेपाल राष्ट्र बैङ्कले सार्वजनिक बिदाका दिन पनि बैङ्किङ सेवा उपलब्ध गराउन बैङ्क तथा वित्तीय संस्थालाई निर्देशन दिएको छ।
केन्द्रीय बैङ्कले एक निर्देशन जारी गर्दै होली पर्व र प्रतिनिधिसभा सदस्य निर्वाचनको दिन अर्थात् फागुन २१ गते बिहीबारका दिन कार्यालयहरू सञ्चालनमा रहने व्यवस्था मिलाउन आग्रह गरेको हो।
राष्ट्र बैङ्कले सरकारी कारोबार गर्न तोकिएका वाणिज्य बैङ्कहरूलाई भुक्तानी र राजस्व दाखिलाको उचित व्यवस्था मिलाउन निर्देशन दिएको छ।
विशेषगरी निर्वाचन प्रचारप्रसारका लागि राजनीतिक दल तथा उम्मेदवारहरूका नगद, चेक वा अन्य विनिमय साधनहरूको दाखिला र भुक्तानीलगायतका बैङ्किङ सेवाहरू निरन्तर प्रदान गर्न यस्तो व्यवस्था गरिएको हो। यस निर्णयले निर्वाचनको समयमा हुने आर्थिक कारोबारलाई सहज बनाउने अपेक्षा गरिएको छ।

























