झापामा चार वर्षपछि बर्डफ्लूको पुनरागमन, दमकका फार्मबाट कुखुरा नष्ट गर्ने तयारी

Share this
672shares
मुलुकी खबर
मुलुकी खबर
clock२०८२ चैत ८, आइतबार १८:३५

दमक । झापामा चार वर्षको अन्तरालपछि पुनः कुखुरामा बर्डफ्लू संक्रमण पुष्टि भएको छ । छिमेकी मोरङको सुन्दरहरैँचा र उर्लाबारीमा संक्रमण पुष्टि भएसँगै झापाको दमकमा पनि यसको असर देखिएको हो ।

दमक नगरपालिका–१० मा रहेको दमक एग्रिकल्चर फार्म प्रा.लि.का कुखुरामा घातक प्रकृतिको बर्डफ्लू संक्रमण फेला परेसँगै स्थानीय कुखुरा व्यवसायीहरूमा त्रास थपिएको छ । भेटेरिनरी अस्पताल तथा पशु सेवा विज्ञ केन्द्र झापाकी प्रमुख शीतल भट्टराईका अनुसार फार्ममा अचानक कुखुरा मर्न थालेपछि सञ्चालकले नमुना परीक्षणका लागि विराटनगरस्थित प्रयोगशालामा पठाएका थिए ।

त्यहाँबाट थप परीक्षणका लागि काठमाडौँको केन्द्रीय प्रयोगशालामा नमुना पठाइएको थियो । शनिबार प्राप्त रिपोर्टले बर्डफ्लू संक्रमण पुष्टि गरेपछि सम्बन्धित निकायहरू सक्रिय बनेका छन् ।

प्रमुख भट्टराईका अनुसार आइतबार नै कोशी प्रदेश सरकारको ‘रेपिड रेस्पोन्स टिम’ प्रभावित क्षेत्रमा खटाइसकिएको छ । उक्त टोलीले प्रारम्भिक अध्ययन गर्दै फार्मको चार किल्ला निर्धारण गरेको छ । कुखुराको कुल संख्या, मरेको संख्या र जोखिमको स्तरबारे विस्तृत विवरण संकलन गर्ने काम भइरहको छ ।

संक्रमण फैलिन नदिन प्रभावित फार्मका कुखुरा नष्ट गर्ने तयारी भइरहेको छ । सरकारले बर्डफ्लू संक्रमण पुष्टि भएका फार्महरूलाई क्षतिपूर्ति दिने व्यवस्था गरेको पनि भट्टराईले स्पष्ट पारिन् । यसले प्रभावित किसानलाई केही राहत मिल्ने अपेक्षा गरिएको छ । तर, संक्रमणको जोखिम र आर्थिक क्षतिको सम्भावनाले किसानहरू चिन्तित बनेका छन् ।

यसैबीच, झापा गाउँपालिका–७ मा रहेको सुदीक्षा कृषि फार्ममा पनि बर्डफ्लूको अर्को प्रकार ‘एचवान लो प्याथोजेनिक’ संक्रमण देखिएको छ । स्थानीय कृषक दुर्गाप्रसाद भट्टराईको फार्ममा देखिएको यो संक्रमण भने तुलनात्मक रूपमा कम जोखिमयुक्त मानिन्छ । चिकित्सकीय उपचारबाट निको हुन सक्ने भएकाले यसलाई गम्भीर रूपमा नलिइएको अधिकारीहरू बताउँछन् ।

लो प्याथोजेनिक संक्रमण भएका फार्मलाई भने सरकारले क्षतिपूर्ति उपलब्ध नगराउने व्यवस्था छ । त्यस्ता किसानलाई आवश्यक औषधि तथा प्राविधिक सहयोग मात्रै उपलब्ध गराइएको प्रमुख भट्टराईले जानकारी दिइन् । यसले उच्च जोखिम र न्यून जोखिम संक्रमणबीचको सरकारी नीतिगत भिन्नतालाई पनि स्पष्ट पार्छ ।

नेपालमै पहिलो पटक बर्डफ्लू संक्रमण झापामै फेला परेको थियो । २०६५ साल माघमा काँकडभिट्टामा देखिएको संक्रमण नियन्त्रण गर्न करिब २८ हजारभन्दा बढी कुखुरा तथा चल्ला नष्ट गरिएको थियो । त्यसपछि पनि २०६९ र २०७८ सालमा झापामा बर्डफ्लू देखा परिसकेको छ । अहिले फेरि संक्रमणको पुनरागमन भएको छ ।

विशेषज्ञहरूका अनुसार बर्डफ्लू संक्रमण फैलिन नदिन तत्काल नियन्त्रण, निगरानी र जनचेतना अत्यन्त आवश्यक हुन्छ । खुला सिमानाका कारण छिमेकी जिल्लाबाट संक्रमण सर्ने जोखिम उच्च रहने भएकाले सीमावर्ती क्षेत्रमा विशेष सतर्कता अपनाउनुपर्ने देखिएको छ ।

झापामा देखिएको बर्डफ्लू संक्रमणले कुखुरा व्यवसायसँगै समग्र कृषि अर्थतन्त्रमै असर पार्न सक्ने देखिन्छ । नियन्त्रणका लागि विशेष रणनीति बनाएर सरकारी संयन्त्र अघि बढ्नुपर्ने सरोकारवालाको सुझाव छ ।

तपाइको प्रतिक्रिया
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
सुनसरीलाई सीसीटीभी निगरानीमा राख्ने योजना, २५० वटा जडान गरिँदै
दानबहादुर कार्कीको रिटमा बुधबार सर्वोच्चमा सुनुवाइ हुँदै
© 2024 Muluki Khabar. All Rights Reserved. Design & Develop By: Indesign Media Pvt. Ltd.