
विराटनगर । विराटनगरबाट भारतीय नागरिक मसुल अन्सारीलाई प्रहरीले सोमबार साँझ पक्राउ गरेको छ ।
भारत बिहारका २९ वर्षीय अन्सारीलाई विराटनगर महानगरपालिका–१५ स्थित १ नम्बर ढाटबाट प्रहरीले साँझ ६ः३० बजेतिर पक्राउ गरेको हो । जोगवनीबाट पैदल नै नेपाल आउँदै गरेका उनलाई प्रहरीले नियन्त्रणमा लिएर खानतलासी गरेको थियो ।
इलाका प्रहरी कार्यालय रानी र लागुऔषध नियन्त्रण ब्युरो विराटनगरबाट खटिएको संयुक्त टोलीले नियन्त्रणमा लिएर शरीर खानतलासी गर्दा साथबाट लागुऔषध ब्राउन सुगर (खैरो हेरोइन)जस्तो देखिने पदार्थ बरामद भएको थियो । अन्सारीको साथमा ३२ ग्राम ब्राउन सुगर रहेको प्रहरीले जनाएको छ ।
पक्राउ परेका अन्सारीलाई इलाका प्रहरी कार्यालय रानीको हिरासतमा राखेर इन्स्पेक्टर कविन राई नेतृत्वको टोलीले अनुसन्धान गरिरहेको छ । उनीविरुद्ध लागुऔषध ऐनअन्तर्गतको मुद्दा चलाउने प्रहरीको तयारी छ ।

























