
विराटनगर । उद्योग संगठन मोरङको आयोजनामा विराटनगरमा जारी ‘घर निर्माण प्रदर्शनी’ को दोस्रो दिन सुरक्षित र मजबुत घर निर्माणका विविध प्राविधिक पक्षमा केन्द्रित रहँदै बृहत् छलफल तथा अन्तरक्रिया सम्पन्न भएको छ ।
प्रदर्शनीअन्तर्गतको ‘थिमेटिक सेसन’ (विषयगत सत्र) मा निर्माण सामग्रीको गुणस्तर मापन र घरको अग्नि सुरक्षाका विषयमा विज्ञहरूले आफ्ना प्रस्तुति राखेका थिए ।
सेसनको पहिलो सत्रमा ‘निर्माण सामग्रीको गुणस्तर कसरी जाँच्ने’ शीर्षकमा बोल्दै इन्जिनियर अमितकुमार गुप्ताले निर्माण सामग्रीको छनोट र प्रयोगमा हुने सानो लापरबाहीले ठुलो आर्थिक र संरचनात्मक क्षति निम्त्याउने बताए । उनले विशेषगरी सिमेन्टको भण्डारण अवधि र त्यसको भारवहन क्षमताको सम्बन्धबारे महत्त्वपूर्ण जानकारी दिए ।
इन्जिनियर गुप्ताका अनुसार ३ महिना भण्डारण गरिएको सिमेन्टको क्षमता २० प्रतिशतले घट्छ । ६ महिनामा ३० प्रतिशत र १ वर्ष भण्डारण भएमा ४० प्रतिशत क्षमता कम हुन्छ । २ वर्षसम्म भण्डारण भएको सिमेन्टको क्षमता ५० प्रतिशतसम्म घट्ने भएकाले यस्तो सिमेन्ट प्रयोग गर्नु जोखिमपूर्ण हुने भएकाले प्रयोग गर्न हुँदैन ।
उनले नेपाली समाजमा इन्जिनियरको प्राविधिक निर्देशनलाई बेवास्ता गर्ने चलन रहेको भन्दै गुणस्तरीय संरचनाका लागि प्राविधिक सल्लाह अनिवार्य पालना गर्न आग्रह गरे ।
त्यस्तै, दोस्रो सत्रमा इरोटेक टेक्नोलोजी संचालक एवं विज्ञ आशिष अग्रवालले ‘अग्नि सुरक्षा प्रणाली तथा घर सुरक्षा अभ्यास’ बारे जानकारी दिए । उनले आगलागीबाट हुने मानवीय र भौतिक क्षतिको मुख्य कारण आगो लागेको ढिलो थाहा पाउनु रहेको उल्लेख गरे ।
करिब ८० प्रतिशत आगलागीजन्य मृत्यु घर र कार्यालयमै हुने गरेको बताउँदै, अग्रवालले भने, ‘सानो आगो ३ मिनेटभित्रै नियन्त्रण बाहिर जान सक्छ । त्यसैले आधुनिक स्मार्ट प्रविधिको प्रयोग गरी धुवाँ वा असामान्य तापक्रमको सूचना मोबाइल एपमार्फत तत्काल पाउने र स्वचालित रूपमा विद्युत् आपूर्ति बन्द हुने प्रणाली जडान गर्नु जरुरी छ । सिसिटिभी र फायर अलार्मलाई एकीकृत गरी २४ सैँ घण्टा घरको सुरक्षा सुनिश्चित गर्न सकिने छ ।’
प्रदर्शनीमा आधुनिक प्रविधि, उपकरण र निर्माण सामग्रीका ७५ वटा स्टल राखिएका छन् ।
यसैक्रममा, शनिबार आधुनिक घरका लागि ‘वास्तुकलाको सिद्धान्त र प्रयोग तथा इन्टेरियर डिजाइन अवधारणा र स्पेस प्लानिङ’ का विषयमा विज्ञहरूको प्रस्तुतीकरण र अन्तरक्रिया रहने आयोजकले जनाएको छ । सुरक्षित र सुन्दर घर बनाउन चाहने सर्वसाधारणका लागि यो प्रदर्शनी एउटा महत्त्वपूर्ण थलो बनेको छ ।



















