प्रधानन्यायाधीश प्रकाशमान सिंह राउत भोलिदेखि अनिवार्य अवकाशमा

काठमाडौं। प्रधानन्यायाधीश प्रकाशमान सिंह राउत भोलिदेखि अनिवार्य अवकाशमा जाँदैछन्। ६५ वर्षे उमेर हदका कारण उनी अवकाशमा जान लागेको सर्वोच्च अदालतका प्रवक्ता अर्जुनप्रसाद कोइरालाले बताए। राउतको अवकाशपछि वरिष्ठतम् न्यायाधीश सपना प्रधान मल्लले कायममुकायम प्रधानन्यायाधीशको जिम्मेवारी सम्हाल्नेछिन्।

कानुन व्यवसायीको पृष्ठभूमिबाट आएका राउत २०७३ साउन १७ गते सर्वोच्चको न्यायाधीश बनेका थिए। ३३ वर्ष वकालत र ८ वर्ष न्यायाधीशका रूपमा बिताएका उनी १८ महिनाअघि प्रधानन्यायाधीश बनेका थिए। न्यायपालिकाभित्रको विकृति र विसङ्गति अध्ययन गर्न गठित हरिकृष्ण कार्की नेतृत्वको समितिमा सदस्य रहेकाले उनको कार्यकालमा सुधारको अपेक्षा गरिएको थियो।

आफ्नो कार्यकालमा केही संरचनागत सुधार गरे पनि आफैँ संलग्न रहेको समितिको प्रतिवेदन पूर्ण रूपमा कार्यान्वयन गराउन नसकी उनी बिदा हुन लागेका छन्। न्यायालयको शुद्धीकरण गर्ने कसम खाएका राउतले अपेक्षा गरिए अनुसारको सुधारका काम अधुरै छाडेर अवकाश लिन लागेका हुन्।