
काठमाडौं । अघिल्ला दुई दिनमा ११९ अङ्कले घटेको सेयर बजारको परिसूचक नेप्से मंगलबार भने १९.७० अङ्कले बढेको छ । आजको वृद्धिसँगै नेप्से परिसूचक २८५१ अङ्कमा कायम भएको छ । कारोबार अवधिको न्यून विन्दु २७८९ अङ्कसम्म झरेको बजारले अन्त्यमा सुधारको लय समातेको हो ।
बजार बढे पनि कारोबार रकममा भने सामान्य गिरावट आएको छ । अघिल्लो दिन १२ अर्ब ९६ करोड रुपैयाँको कारोबार भएकोमा आज ११ अर्ब ११ करोड रुपैयाँको मात्र सेयर किनबेच भयो ।
बजारका अधिकांश समूहगत सूचकहरूमा हरियाली छाएको छ । उत्पादन तथा प्रशोधन समूह सबैभन्दा धेरै १.९४ प्रतिशतले बढ्यो भने बैंकिङ, विकास बैंक, फाइनान्स, होटल तथा पर्यटन, हाइड्रोपावर र बिमा समूहका सूचकहरू पनि बढेका छन् । यद्यपि, अन्य समूह भने ०.५५ प्रतिशतले घटेको छ । आज कुल १९५ कम्पनीको सेयर मूल्य बढ्दा ६३ कम्पनीको घट्यो भने ९ कम्पनीको मूल्य स्थिर रह्यो ।
आज ६ वटा कम्पनीको सेयर मूल्यमा १० प्रतिशतको सकारात्मक सर्किट लागेको छ । मूल्य बढ्नेमा रिलायन्स स्पिनिङ मिल्स, सुपरखुदी हाइड्रोपावर, रिजलाइन इनर्जी, सूर्यकुन्ड हाइड्रोइलेक्ट्रिक, भुजुङ हाइड्रोपावर र होटल फरेस्ट इन रहेका छन् ।
अर्कोतर्फ सप्तकोशी विकास बैंकको मूल्य सबैभन्दा धेरै ८.९६ प्रतिशतले घट्यो । आज धेरै कारोबार हुने कम्पनीहरूमा रिडी पावर, अपी पावर, एनआरएन इन्फ्रास्ट्रक्चर, एसवाई प्यानल र कुमारी बैंक अगाडि देखिएका छन् ।



















