नेपाली क्लाइम्बिङ टोली चीन प्रस्थान 

काठमाडौं । चीनमा आयोजना हुने दुई महत्त्वपूर्ण अन्तर्राष्ट्रिय प्रतियोगिताहरूमा नेपालको चुनौती पेस गर्न नेपाली क्लाइम्बिङ टोली आगामी आइतबार चीन प्रस्थान गर्ने भएको छ ।

टोलीले जापानमा हुने २० औँ एसियाली खेलकुदको छनोट प्रतियोगिताका साथै विश्व क्लाइम्बिङ सिरिजमा सहभागिता जनाउने छ । नेपाल क्लाइम्बिङ स्पोर्ट एसोसिएसनका अनुसार प्रतियोगिताको पुरुष विधामा तेन्जिङ बर्टिन राई र रोनक उप्रेतीले प्रतिस्पर्धा गर्नेछन् भने महिला विधामा स्वस्तिका चौधरीले नेपालको प्रतिनिधित्व गर्ने छिन् ।

चीनको मिसानमा अप्रिल ८ देखि १२ तारिखसम्म ‘एसियाली क्लाइम्बिङ च्याम्पियनसिप’ सञ्चालन हुनेछ । नेपालले यसमा ‘बाउल्डर’ र ‘लिड’ स्पर्धामा भाग लिने छ । यस प्रतियोगितामा शीर्ष १६ स्थानभित्र पर्न सकेमा नेपाली खेलाडीहरूले आगामी एसियाली खेलकुदमा आफ्नो स्थान सुरक्षित गर्ने छन् । संघका महासचिव सन्तोष माडेनले नेपाली खेलाडीहरू उच्च मनोबलका साथ मैदानमा उत्रने बताए ।

च्याम्पियनसिप लगत्तै टोलीले मे १ देखि ३ सम्म चीनकै केकियाओमा हुने ‘विश्व क्लाइम्बिङ सिरिज’मा भाग लिनेछ । यसमा ‘बाउल्डर’ विधा मात्र समावेश गरिएको छ । दुई प्रतियोगिताको बीचको समयमा नेपाली खेलाडीहरूले त्यहीं नै विशेष प्रशिक्षण लिने जानकारी संघका सचिव सुजित कँडेलले दिए ।

प्रतियोगितामा सहभागी हुने टोलीलाई राष्ट्रिय खेलकुद परिषद् (राखेप) का सदस्यसचिव रामचरित्र मेहताले शुक्रबार एक कार्यक्रमका बीच सफलताको शुभकामना दिँदै बिदाइ गरे ।

बिदाइका क्रममा उनले नेपाली खेलाडीहरूले अन्तर्राष्ट्रिय स्तरमा उत्कृष्ट प्रदर्शन गरी देशको नाम उच्च राख्ने विश्वास व्यक्त गरे ।