
विराटनगर । आयोजक टोलीलाई स्तब्ध पार्दै पाहुना टोली सुनसरीको धरान फुटबल क्लब सेमिफाइनलमा प्रवेश गरेको छ ।
मोरङको बुढीगंगा गाउँपालिकामा जारी ‘प्रथम बुढीगंगा गोल्डकप’ फुटबल प्रतियोगितामा धरानले आयोजक बुढीगंगा पालिका टिमलाई २–० गोल फरकमा हराउँदै सेमिफाइनलको यात्रा तय गरेको हो ।
खेलको पहिलो मिनेटमै आयोजकविरुद्ध धरानका सविन राईले गोल गर्दै टोलीलाई अग्रता दिलाए । आयोजकलाई दबाबमा राख्दै धरानका लागि ४२ औं मिनेटमा तपन कार्कीले गोल गर्दै अग्रतालाई दोब्बर बनाए ।
आयोजकले गोल गर्ने प्रयास गरे पनि सफल नहुँदा खेल पाहुना टोलीलाई सुम्पनु पर्यो । खेलको प्लेयर अफ द म्याच धरानका सविन राईले नगद ५ हजार रुपैयाँ प्राप्त गरे ।
प्रतियोगिताको अन्तिम क्वाटर फाइनल खेल मंगलबार भारत सिलगुडीको कञ्चनजंघा फुटबल क्लब र नाइजेरियाको जस्ट जोन फुटबल क्लबबीच प्रतिस्पर्धा हुने आयोजकले जनाएको छ ।
प्रतियोगिताको विजेताले नगद ५ लाख र उपविजेताले नगद २ लाख ५० हजार रुपैयाँका साथै ट्रफी, मेडल र प्रमाणपत्र प्राप्त गर्ने छन् ।

























