
विराटनगर । विराटनगरमा जारी ५ औँ इक्युवालिटी कप क्रिकेट प्रतियोगितामा विराटनगर हब विजयी हुँदै शीर्ष स्थानमा रहेको छ । तालिकामा विराटनगरले २ खेलमा दुवै जित्दै ४ अंकका साथ शीर्ष स्थानमा रहेको हो ।
त्यस्तै, १ खेल खेलेको सप्तरीको राजविराज हब २ अंका साथ दोस्रो स्थान, सिरहा हब २ खेलमा दुवै हार्दै अंकविहीन तेस्रो र नेपाल क्रिकेट फाउण्डेसन (एनसीएफ) १ खेलमा हार्दै तालिकाको पुच्छरमा रहेको छ ।
नेपाल क्रिकेट फाउन्डेसनद्वारा आयोजित प्रतियोगिताको शनिबारको पहिलो खेलमा विराटनगरले सिरहा हबलाई ८ विकेटले हराउँदै शीर्ष स्थान रहेको हो ।
टस जित्दै पहिले ब्याटिङ थालेको सिरहाले १६ ओभर ४ बल खेल्दै सबै विकेटको क्षतिमा ६३ मात्रै बनाउन सक्यो । मिना महतोले १७ रन र निलम महतोले ११ रन बनाए । बलिङमा विराटनगरकी सानु राजवंशीले ३, साम्रिका गौतमले र समीक्षा राईले २–२ तथा धनमति रायले १ विकेट लिए ।
६४ रनको लक्ष्य पाएको विराटनगरले १० ओभर ३ बलमा २ विकेट गुमाउँदै ६४ रन बनाएर विजयी भयो । सानु राजवंशीले ३५ रनको योगदान गरिन् । बलिङमा सिरहाकी स्वेता लामाले १ विकेट लिइन् । खेलको प्लेयर अफ द म्याच विराटनगर सानु राजवंशी भइन् ।

























