इक्युवालिटी कपको फाइनलमा विराटनगर र सप्तरी

विराटनगर । विराटनगरमा जारी ५ औँ इक्युवालिटी कप क्रिकेट प्रतियोगिताको फाइनलमा विराटनगर हब र सप्तरीको राजविराज हब पुगेका छन् ।

एक दिनको खेल बाँकी छँदै दुवै टोली फाइनलमा पुगेका हुन् । खेल तालिकाको आधारमा सप्तरीको राजविराज हब २ खेलमा दुवै जित्दै ४ अंकका साथ शीर्ष स्थानमा रहेको छ । विराटनगरले २ खेलमा दुवै जित्दै ४ अंकका साथ दोस्रो स्थानमा छ भने सिरहा हब २ खेलमा दुवै हार्दै अंकविहीन तेस्रो र नेपाल क्रिकेट फाउण्डेसन (एनसीएफ) २ खेलमा हार्दै तालिकाको पुच्छरमा रहेको छ ।

नेपाल क्रिकेट फाउन्डेसनद्वारा आयोजित प्रतियोगिताको शनिबारको दोस्रो खेलमा सप्तरीले नेपाल क्रिकेट फाउन्डेसन (एनसीएफ) लाई ११९ रनको फराकिलो स्कोरमा पराजित गरेको हो ।

एनसीएफले टस जितेर बलिङ गर्ने निर्णय गरेसँगै सप्तरीले पहिले ब्याटिङको अवसरमा पाएको थियो ।
पहिले ब्याटिङ थालेको सप्तरीले २० ओरभमा ५ विकेटको क्षतिमा १५० रन बनायो । साक्षी यादवले ७० रन र साक्षी देवले १७ रनको योगदान गरे । बलिङ एनसीएफकी अनिशा थापा, सञ्जिता खड्का, तनुजा मगर, सन्जु परियार र झरना घिमिरेले समान १–१ विकेट लिए ।

१५१ रनको लक्ष्य पछ्याउने क्रममा एनसीएफले १९ ओभर २ बलमा सबै विकेट गुमाउँदै ३१ रनमै समेटियो । कसैले पनि दोहोरो अंक बनाउन सकेनन् । बलिङमा सप्तरीकी सञ्चिता यादवले २ विकेट र सुस्मिता यादवले १ विकेट लिए ।

खेलको प्लेयर अफ द म्याच सप्तरीकी साक्षी यादव भइन् । प्रतियोगिताअन्तर्गत आइतबारको पहिलो खेल सिरहा र एनसीएफ तथा दोस्रो विराटनगर र सप्तरीबीच हुने आयोजकले जनाएको छ ।