एपीएफलाई राष्ट्रिय कबड्डीको उपाधि

सुनसरी । प्रथम कोशीटप्पु खुला महिला राष्ट्रिय कबड्डी प्रतियोगिताको उपाधि विभागीय टोली सशस्त्र प्रहरी बल (एपीएफ) ले जितेको छ ।

इनरुवा नगरपालिका–२ स्थित शिक्षा खेल मैदानमा सम्पन्न फाइनल खेलमा एपीएफले अर्को विभागीय टोली नेपाल प्रहरीलाई २०–१७ अंकले पराजित गर्दै उपाधि आफ्नो नाममा गरेको हो । प्रतिस्पर्धात्मक बनेको खेलमा एपीएफले सुरुदेखि नै आक्रामक प्रदर्शन गर्दै नेपाल प्रहरीमाथि दबाब बनाएको थियो ।

Advertisement

जिल्ला खेलकुद क्लब सुनसरीका अध्यक्ष तरुणकुमार यादवका अनुसार प्रतियोगितामा कोशी प्रदेश र त्रिभुवन आर्मीले संयुक्त रूपमा तेस्रो स्थान हासिल गरेका छन् । प्रतियोगिताको विजेता एपीएफले नगद एक लाख रुपैयाँसहित ट्रफी प्राप्त गरेको छ भने उपविजेता नेपाल प्रहरीले ५० हजार रुपैयाँ र ट्रफीमा चित्त बुझाएको छ ।

तेस्रो हुने दुई टोलीलाई २५–२५ हजार रुपैयाँ, ट्रफी, पदक तथा प्रमाणपत्र प्रदान गरिएको आयोजकले जनाएको छ । विजेता टोलीलाई कोशी प्रदेशका उद्योग, कृषि तथा सहकारी मन्त्री इस्राइल मन्सुरीले पुरस्कार वितरण गरेका थिए ।

प्रतियोगिताले महिला कबड्डी खेलको विकास र खेलाडीहरूको उत्साह बढाउन सहयोग पुगेको आयोजकको विश्वास छ ।