सद्भाव भड्काउने अभिव्यक्ति दिएको आरोपमा एक जना पक्राउ

काठमाडौं । धार्मिक भावनामा आघात पुर्‍याउने र सामाजिक सद्भाव भड्काउने गरी अभिव्यक्ति दिएको आरोपमा प्रहरीले एक जनालाई पक्राउ गरेको छ।

रुकुम पश्चिमको आठबिसकोट नगरपालिका–१२ स्थायी घर भई हाल काठमाडौंको टोखा नगरपालिका–८ बानियाँ टारका २७ वर्षीय जनक परियारलाई पक्राउ गरेको प्रहरीले जनाएको छ ।

Advertisement

जिल्ला प्रहरी परिसर काठमाडौंका प्रवक्ता एवं प्रहरी उपरीक्षक (एसपी) पवनकुमार भट्टराईका अनुसार परियारले विभिन्न माध्यमबाट धार्मिक सद्भावमा खलल पुग्ने र जनमानसमा नकारात्मक असर पर्ने खालका अभिव्यक्ति दिएका थिए। सोही आधारमा उनलाई नियन्त्रणमा लिइएको हो।

धार्मिक भावनामा आघात पुर्‍याउने र सद्भाव भड्काउने गतिविधिमा संलग्न रहेको भन्दै प्रहरीले उनीमाथि थप अनुसन्धान र कानुनी प्रक्रिया अगाडि बढाएको जनाएको छ।