मेचीनगरमा काठमाडौंका युवक पक्राउ

झापा । झापाको मेचीनगरबाट लागुऔषध खैरो हिरोइन (ब्राउन सुगर)सहित काठमाडौंका एक युवक पक्राउ परेका छन् । इलाका प्रहरी कार्यालय काँकरभिट्टा र लागुऔषध ब्युरो काँकरभिट्टाको संयुक्त टोलीले आइतबार दिउँसो मेचीनगर–६ मेचीडाँडाबाट ती युवकलाई पक्राउ गरेको हो ।

भारतबाट पैदल नेपालतर्फ आउँदै गरेका ३२ वर्षीय रोशन कार्कीलाई नियन्त्रणमा लिएको प्रहरीले जनाएको छ । काठमाडौंको शंखरापुर नगरपालिका–८ का कार्कीलाई प्रहरीले नियन्त्रणमा लिएर शरीर खानतलासी गरेको थियो । त्यसक्रममा उनले लगाएको बक्स पेन्टको गोजीबाट सेतो प्लाष्टिकमा प्याक गरिएको खैरो हिरोइनजस्तो देखिने पदार्थ बरामद भएको प्रहरीले जनाएको छ ।

Advertisement

डिजिटल तराजुमा नाप गर्दा ४८ ग्राम ६० मिलिग्राम लागुऔषध रहेको पुष्टि भएको प्रहरीले जनाएको छ । प्रहरीले कार्कीको साथबाट आइफोन १६ प्रो म्याक्स मोबाइल, प्रयोगमा रहेको सिम कार्ड तथा नगद ८ हजार रुपैयाँसमेत बरामद गरेको छ । पक्राउ परेका कार्कीमाथि इलाका प्रहरी कार्यालय काँकरभिट्टाले थप अनुसन्धान गरिरहेको छ ।