मोरङमा लागुऔषध ओसारपसारको अनौठो शैली : कन्डमभित्र राखेर मलद्वारमा लुकाइयो, दिसा गराएर निकालियो

मुलुकी खबर

२०८३ जेष्ठ २४, आइतबार ११:४२

विराटनगर । मोरङको उर्लाबारी नगरपालिका–७ स्थित गोल चोकबाट लागुऔषध खैरो हेरोइन (ब्राउन सुगर)सहित दुई जना युवक पक्राउ परेका छन् ।

लागुऔषध ओसारपसार भइरहेको विशेष सूचनाका आधारमा इलाका प्रहरी कार्यालय उर्लाबारीबाट खटिएको टोलीले उर्लाबारी नगरपालिका–६ का २९ वर्षीय केशव श्रेष्ठ र उर्लाबारी–५ का २४ वर्षीय निश्चल गुरुङलाई पक्राउ गरेको हो । पक्राउ परेका दुवै जनाले शरीरभित्र मलद्वारमा लुकाएर राखेको लागुऔषध दिसा गराएर बाहिर निकालिएको थियो ।

प्रहरीले नियन्त्रणमा लिएपछि दुवै जनाले पारदर्शी कन्डमभित्र कालो प्लाष्टिकमा प्याक गरेर मलद्वारमा लागुऔषध लुकाएको बताएका थिए । त्यसपछि दुवै जनालाई मंगलबारेस्थित मदन भण्डारी अस्पताल एवं ट्रमा सेन्टर लगेर चिकित्सकीय निगरानीमा ‘दिसा गराउने औषधि’ सेवन गराइएको थियो । शनिबार साँझ पौने ६ बजेतिर दक्षिणबाट उत्तरतर्फ आउँदै गरेको प्रदेश १–०२–०५० प १९६० नम्बरको मोटरसाइकललाई प्रहरीले नियन्त्रणमा लिएको थियो ।

मोटरसाइकलमा सवार रहेका उनीहरुलाई शंकास्पद गतिविधिका आधारमा प्रहरीले नियन्त्रणमा लिएको हो । प्रारम्भिक सोधपुछकै क्रममा श्रेष्ठ र गुरुङले मलद्वारमा खैरो हेरोइन लुकाएको बताएपछि तत्काल अस्पताल लगिएको मोरङ प्रहरीका सूचना अधिकारी डीएसपी मकेन्द्रकुमार मिश्रले बताए ।

उनका अनुसार सुरुमा औषधि सेवन गराए पनि दिसा नलागेपछि दुवै जनालाई इलाका प्रहरी कार्यालय उर्लाबारी लगिएको थियो । प्रहरी कार्यालयमा राखिएकै अवस्थामा आइतबार बिहान करिब ३ः३० बजेतिर दुवै जनाले दिसा गर्दा शरीरबाट शंकास्पद वस्तु बाहिर निस्किएको मिश्रको भनाइ छ । उनका अनुसार पारदर्शी कन्डमभित्र कालो पोलिथिनमा बेरिएको अवस्थामा खैरो हेरोइनजस्तो देखिने लिसाइलो पदार्थ फेला परेको हो ।

श्रेष्ठको मलद्वारबाट प्लास्टिकसहित १८ ग्राम ९२० (प्लाष्टिकबाहेक १४ ग्राम ७२०) मिलिग्राम र गुरुङको मलद्वारबाट प्लास्टिकसहित ११ (प्लाष्टिकबाहेक ९ ग्राम ४००) ग्राम खैरो हेरोइन निस्किएको प्रहरीले जनाएको छ । पक्राउ परेकाहरुले लागुऔषधलाई अत्यन्तै गोप्य तरिकाले शरीरभित्र लुकाएर ओसारपसार गरेको प्रारम्भिक अनुसन्धानले देखाएको छ । मलद्वारमा कन्डम र पोलिथिन प्रयोग गरेर प्याकिङ गरिएको अवस्थाले लागुऔषधको ओसारपसारमा तस्करहरूले नयाँ र जोखिमपूर्ण तरिका अपनाउन थालेको प्रष्ट हुने मोरङ प्रहरी प्रमुख एसपी कवित कटवालले बताए ।

मोरङ प्रहरीले जिल्लामा लागुऔषधविरुद्धको महाअभियान सञ्चालन गरिरहेको छ । लागुऔषधले समाज, परिवार र व्यक्तिगत जीवनलाई तहसनहस बनाएपछि प्रहरी सक्रियता बढाउनुका साथै महाअभियान सञ्चालन गरेर सबै पक्षलाई सचेत गराउने काम भइरहेको जानकारी कटवालले दिए । उनका अनुसार अभियान जारी रहँदा लागुऔषध नियन्त्रणमा प्रहरीले उल्लेख्य सफलता हासिल गरिरहेको छ ।

उर्लाबारीबाट दुई जना पक्राउ परेको घटनाले लागुऔषध तस्करीको नयाँ शैलीका बारेमा उजागर भएको छ । त्योसँगै प्रभावकारी अनुसन्धान विधिकै कारण जोखिमपूर्ण तवरबाट शरीरमा लुकाएर ओसारपसार भइरहेको लागुऔषध पत्ता लगाउन र त्यसको धन्दामा संलग्नहरुलाई पक्राउ गर्न प्रहरी सफल भएको छ ।

लागुऔषध ओसारपसारमा प्रयोग गरिएको प्रदेश १–०२–०५० प १९६० नम्बरको मोटरसाइकल पनि प्रहरीले बरामद गरेको छ । मोटरसाइकल चालक केशव श्रेष्ठ हुन् । दुवै जनाले प्रयोग गर्ने मोबाइल पनि प्रहरीले नियन्त्रणमा लिएको छ । मोबाइलका आधारमा अनुसन्धान गरेर लागुऔषध कारोबारमा संलग्न गिरोहका अन्य सदस्य पत्ता लगाउन सजिलो हुने प्रहरीको भनाइ छ ।

पक्राउ परेकाको मोबाइल अध्ययन गरेपछि लागुऔषध कारोबारसँग सम्बन्धित सम्पर्क, लेनदेन वा अन्य संलग्न व्यक्तिहरूको बारेमा पत्ता लगाउन प्रहरीलाई सहज हुनेछ । एसपी कटवालले लागुऔषध लुकाउने शैली अत्यन्तै जोखिमपूर्ण र स्वास्थ्यका दृष्टिले पनि खतरनाक रहेको जनाए । ‘शरीरभित्र विशेष गरी मलद्वारमा लागुऔषध लुकाउँदा आपतकालीन अवस्थासमेत सिर्जना हुन्छ । ज्यान जोखिममा पर्छ । यसरी ओसारपसार गर्नु भनेको आफ्नो काल आफैंले निम्त्याउनु हो,’ उनले भने ।

बेलैमा चिकित्सकीय निगरानीमा प्रक्रिया अघि बढाइएकाले दुवै जनाको ज्यान जोगिएको जानकारी कटवालले दिए । लागुऔषध ओसारपसारमा शरीरभित्र लुकाउने शैली अपनाइनु गम्भीर चुनौतीका रूपमा लिइएको छ । तस्करहरूले अपाउन थालेको नयाँ तरिका लागुऔषध नियन्त्रणको प्रमुख चुनौती बनेको हो ।

‘लागुऔषधको धन्दा सडक वा सीमासम्म सीमित नरही शरीरभित्र लुकाउने जटिल र खतरनाक शैलीमा विकसित भइरहेको देखिन्छ । यस्तो धन्दामा संलग्न व्यक्तिहरूले अत्यन्तै जोखिमपूर्ण तरिका अपनाउने भएकाले नियन्त्रण र अनुसन्धान दुवैतर्फ प्रहरीले सतर्कता अपनाउनुपर्ने आवश्यकता देखिएको छ,’ एसपी कटवाल भन्छन् । पक्राउ परेकामाथि गहिराइसम्म अनुसन्धान गरेर लागुऔषध कारोबारीको सञ्जाल पत्ता लगाइने उनले बताए ।

पक्राउ परेका श्रेष्ठ र गुरुङलाई इलाका प्रहरी कार्यालय उर्लाबारीको हिरासतमा राखेर इन्स्पेक्टर नवीन वली नेतृत्वको टोलीले थप अनुसन्धान गरिरहेको छ । उनीहरुविरुद्ध लागुऔषध ऐनअन्तर्गतको मुद्दा चलाउने प्रहरीको तयारी छ । पक्राउ परेकाहरुले लागुऔषध कसको योजनामा र कहाँबाट ल्याइएको हो तथा कसलाई पुर्‍याउने योजना थियो वा आफैंले कारोबार गर्न ल्याएका हुन् भन्ने बारेमा विस्तृत अनुसन्धान भइरहेको प्रहरीले जनाएको छ ।

पछिल्लो समय इन्स्पेक्टर वलीको नेतृत्वमा उर्लाबारी तथा आसपासका स्थानमा लागुऔषध नियन्त्रणका लागि प्रहरी सक्रिय बनेको छ । लागुऔषध नियन्त्रणमा उर्लाबारी प्रहरीले उल्लेख्य सफलता हासिल पनि गरिरहेको छ । यसअघि प्रहरीले उर्लाबारीमै लागुऔषध भण्डारण गरिएको स्थानमा छापा हानेर ठूलो परिमाणमा बरामद गरेको थियो ।