अमेरिकी हमला, इरानको चेतावनी

एजेन्सी । होर्मुज जलडमरूमध्य नजिक अमेरिकी लडाकु हेलिकोप्टर खसालिएको दाबीपछि अमेरिका र इरानबीचको तनाव फेरि बढेको छ ।

हेलिकोप्टर खसालिएको घटनाको प्रत्युत्तरस्वरूप अमेरिकाले इरानको केशम टापुमा हमला गरेको अन्तर्राष्ट्रिय सञ्चारमाध्यमहरूले जनाएका छन् । अमेरिकी राष्ट्रपति डोनाल्ड ट्रम्पले इरानले अमेरिकी हेलिकोप्टर खसालेको आरोप लगाउँदै त्यसको जवाफ दिइने बताएका थिए ।

Advertisement

त्यसलगत्तै केशम टापुमा विस्फोटको आवाज सुनिएको इरानी सरकारी सञ्चारमाध्यमले जनाएको छ । हालसम्म हमलाबाट भएको मानवीय तथा भौतिक क्षतिको विस्तृत विवरण सार्वजनिक भएको छैन ।

अमेरिकी सेनाले होर्मुज क्षेत्र नजिक दुर्घटनाग्रस्त भएको हेलिकोप्टरका दुई चालक दलका सदस्यलाई सकुशल उद्धार गरिएको जनाएको छ । राष्ट्रपति ट्रम्पले पनि दुवै सैनिक सुरक्षित रहेको बताएका छन् ।

घटनापछि इरानका विदेशमन्त्री अब्बास अराघचीले सामाजिक सञ्जालमार्फत अमेरिका र उसका सहयोगीलाई चेतावनी दिँदै आवश्यक परे कडा जवाफ दिइने बताएका छन् । पछिल्ला दुई महिनादेखि कायम युद्धविराम कमजोर बन्दै गएका बेला यस घटनाले पश्चिम एसियामा पुनः व्यापक सैन्य द्वन्द्व चर्किने चिन्ता बढाएको छ ।

साथै, विश्वकै महत्वपूर्ण तेल तथा व्यापारिक मार्ग मानिने होर्मुज जलडमरूमध्य क्षेत्रको सुरक्षा अवस्थाप्रति पनि अन्तर्राष्ट्रिय समुदायको चासो बढेको छ ।