फार्म हाउसमा खाडल खनेर लागुऔषध लुकाउने १३ जना पक्राउ 

काठमाडौं । काठमाडौंका विभिन्न स्थानमा रहेका फार्म हाउसहरूलाई लागुऔषध भण्डारण र बिक्री केन्द्र बनाएको आरोपमा प्रहरीले १३ जनालाई पक्राउ गरेको छ। टोखा र चन्द्रागिरी नगरपालिका क्षेत्रमा सञ्चालित फार्म हाउसहरूमा छापा मार्दा प्रहरीले ठुलो परिमाणमा नियन्त्रित लागुऔषध बरामद गरेको हो।

पक्राउ पर्नेहरूमा नुवाकोटका निमा तामाङ र विक्रम लामा, रुपन्देहीका सागर बुढाथोकी, भक्तपुरका उद्धव श्रेष्ठ र विकास काफ्ले, सिन्धुलीकी माया विशङ्खे, कालिकोटका खड्क रोकया र कमला थामी रहेका छन् ।

Advertisement

यस्तै, बाजुराकी मेनुका थामी, बाराका प्रदीप भन्ने सञ्जय साह सोनार, पर्साका प्रमोद प्रसाद कलवार तथा काठमाडौँका मोनिका श्रेष्ठ र सुशीला महर्जनलाई पनि प्रहरीले नियन्त्रणमा लिएको छ । विभिन्न जिल्लामा घर भए पनि काठमाडौंको विभिन्न स्थानमा फार्म हाउस सञ्चालनको आवरणमा प्रतिबन्धित लागुऔषधको अवैध कारोबार गर्ने गरेको पाइएपछि उनीहरूलाई पक्राउ गरिएको प्रहरीले जनाएको छ ।

प्रहरीको प्रारम्भिक खानतलासीका क्रममा ती स्थानहरूबाट २ लाख ९ हजार ट्याब्लेट ट्रामाडोल बरामद भएको छ। यसैगरी, सुईमार्फत प्रयोग गरिने बुप्रेनोर्फिन, डाईजेपाम र फेनारगन गरी जम्मा २ हजार ४ सय एम्पुल लागुऔषध समेत फेला परेको छ। बरामद गरिएका सामग्रीहरूमा ७ लाख ८७ हजार ५ सय रुपैयाँ नगद र २८ थान मोबाइल फोन समेत रहेको प्रहरीले जनाएको छ ।

यो समूहले भारतबाट अवैध रूपमा लागुऔषध खरिद गरी नेपाल भित्र्याउने गरेको खुलेको छ। पक्राउ परेका व्यक्तिहरूले फार्म हाउस भित्रको जमिनमा खाडल खनेर लागुऔषध लुकाउने र त्यहीँबाट बजारमा आपूर्ति गर्ने गरेको प्रहरीको प्रारम्भिक अनुसन्धानबाट खुलेको जनाएको छ ।

फार्महाउसलाई आवरण बनाएर जमिनमुनि खाडल खनी लागुऔषध लुकाउने गरेको पाइनुले यो संगठित गिरोह भएको प्रहरीको ठहर छ ।

पक्राउ परेका सबैलाई हिरासतमा राखी लागुऔषध नियन्त्रण ऐन अन्तर्गत थप अनुसन्धान अघि बढाइएको प्रहरीले जनाएको छ। फार्म हाउसको आवरणमा हुने यस्ता अवैध गतिविधिबारे प्रहरीले थप सूक्ष्म निगरानी बढाएको जनाएको छ।