स्पेनको सनसनीपूर्ण जित

अमेरिका । फिफा विश्वकप फुटबल २०२६ अन्तर्गत समूह ‘एच’ मा स्पेनले प्रभावशाली प्रदर्शन गर्दै साउदी अरेबियामाथि ४–० को एकपक्षीय जित हासिल गरेको छ ।

अमेरिकाको एटलान्टास्थित स्टेडियममा आइतबार राति सम्पन्न खेलमा स्पेनले सुरुदेखि नै आक्रामक खेल प्रस्तुत गर्दै विपक्षीमाथि पूर्ण नियन्त्रण कायम गर्दै सनसनीपूर्ण जित निकालेको हो । खेलको १०औँ मिनेटमै युवा स्टार लामिन यामालले गोल गर्दै स्पेनलाई अग्रता दिलाएका थिए । त्यसपछि स्पेनले दबाबलाई निरन्तरता दिँदै २१औँ मिनेटमा मिकेल ओयार्जाबलमार्फत दोस्रो गोल थप्यो ।

त्यसको तीन मिनेटपछि फेरि ओयार्जाबलले नै व्यक्तिगत दोस्रो तथा टोलीका लागि तेस्रो गोल गर्दै पहिलो हाफमै स्पेनलाई बलियो अवस्थामा पुर्‍याए । मध्यान्तरपछिको केही समयमै साउदी अरेबियाले थप दबाब झेल्नुपर्‍यो ।

खेलको ४९औँ मिनेटमा साउदीका डिफेन्डर हसन अल्ताम्बक्तिबाट भएको आत्मघाती गोलले स्पेनलाई ४–० को जित दिलायो । त्यसपछि दुवै टोलीले केही अवसर सिर्जना गरे पनि थप गोल हुन सकेन । स्पेनले सहज जित आफ्नो पक्षमा पार्‍यो ।

लगातार प्रभावशाली प्रदर्शन गरिरहेको स्पेनले दुई खेलबाट चार अंक जोड्दै समूह ‘एच’को शीर्ष स्थान कब्जा गरेको छ । यो जितसँगै स्पेनको नकआउट चरण प्रवेशको सम्भावना थप बलियो बनेको छ ।

समूह ‘एच’ का अन्य टोली उरुग्वे, साउदी अरेबिया र केप भर्डेले भने समान एक–एक अंक मात्र जोड्न सकेका छन् । आगामी खेलको नतिजाले समूहको अन्तिम समीकरण तय गर्ने भए पनि स्पेनले भने उत्कृष्ट गोल अन्तरसहित आफूलाई बलियो दाबेदारका रूपमा प्रस्तुत गरेको छ ।