मोरक्कोको प्रभावशाली प्रदर्शनमा क्यानडाको यात्रा समाप्त

अमेरिका । सह–आयोजक क्यानडा फिफा विश्वकप २०२६ बाट बाहिरिने तीन आयोजक राष्ट्रमध्ये पहिलो टोली बनेको छ ।

टेक्सासको ह्युस्टनमा सम्पन्न अन्तिम–१६ को प्रतिस्पर्धामा मोरक्कोसँग ३–० ले पराजित भएपछि क्यानडाको ऐतिहासिक विश्वकप यात्रा समाप्त भएको हो । यस जितसँगै मोरक्को लगातार दोस्रो विश्वकपमा क्वाटरफाइनल पुग्ने पहिलो अफ्रिकी राष्ट्र बनेको छ ।

Advertisement

खेलको सुरुआत भने क्यानडाको पक्षमा निकै उत्साहजनक देखिएको थियो । पहिलो ११ मिनेटभित्र नै जोनाथन डेभिड र टानी ओलुवासेयीले गोल गर्ने उत्कृष्ट अवसर सिर्जना गरेका थिए । तर, मोरक्कोका अनुभवी गोलरक्षक बोनोले दुवै प्रयास उत्कृष्ट रूपमा बचाउ गर्दै टोलीलाई सुरुआती संकटबाट जोगाए ।

पहिलो हाफमा क्यानडाको दबाब झेलेको मोरक्कोले दोस्रो हाफ सुरु भएपछि खेलको लय पूर्ण रूपमा आफ्नो पक्षमा मोड्यो । खेलको ५०औँ मिनेटमा अशरफ हाकिमीले प्रहार गरेको फ्रिकिकबाट आएको बललाई अजेदिन ओउनाहीले उत्कृष्ट फिनिस गर्दै मोरक्कोलाई अग्रता दिलाए ।

त्यसपछि मोरक्कोले खेलमाथि नियन्त्रण कायम राख्दै क्यानडालाई अवसर सिर्जना गर्नै दिएन । ८२औँ मिनेटमा तीव्र काउन्टर आक्रमणमार्फत ओउनाहीले व्यक्तिगत दोस्रो गोल गर्दै टोलीको अग्रता २–० पुर्‍याए । इन्जुरी समयको अन्तिम क्षणमा सौफियान रहिमीले गोलरक्षक म्याक्सिम क्रेपोलाई बिट गर्दै तेस्रो गोल थपेपछि मोरक्कोले ३–० को सहज जित सुनिश्चित गर्‍यो ।

प्रतिस्पर्धाभर दुवै टोलीबीच कडा टक्कर देखिएको थियो । खेलका क्रममा इंग्लिस रेफ्री माइकल ओलिभरले आठवटा पहेँलो कार्ड देखाएका थिए । जसले खेलको प्रतिस्पर्धात्मक र तनावपूर्ण अवस्था झल्काएको थियो ।

पराजयपछि पनि क्यानडाका मुख्य प्रशिक्षक जेसी मार्सले आफ्ना खेलाडीको प्रदर्शनप्रति सन्तुष्टि व्यक्त गरे । उनले आफ्नो टोलीले विश्व वरीयताको सातौँ स्थानमा रहेको मोरक्कोविरुद्ध उत्कृष्ट खेल प्रस्तुत गरेको बताए ।

मार्सले भने, ‘आज खेलको सुरुदेखि एउटै टोली हाबी थियो । हामी विश्व वरीयताको सातौँ स्थानमा रहेको टोलीभन्दा राम्रो खेलेका थियौँ ।’ उनले अवसरहरूको सदुपयोग गर्न नसक्नु नै टोलीको हारको मुख्य कारण बनेको स्वीकार गरे ।

प्रतियोगिताबाट बाहिरिए पनि यो संस्करण क्यानडाका लागि ऐतिहासिक रह्यो । यस विश्वकपमा क्यानडाले पुरुष विश्वकप इतिहासमै पहिलो अंक हासिल गर्‍यो । पहिलो जित निकाल्यो, पहिलो पटक समूह चरण पार गर्‍यो र पहिलो पटक नकआउट चरणमा पनि जित दर्ता गर्दै नयाँ इतिहास रच्यो । त्यसैले अन्तिम–१६ बाट यात्रा टुंगिए पनि यो विश्वकप क्यानडाली फुटबलका लागि महत्वपूर्ण उपलब्धिहरूले भरिएको प्रतियोगिताका रूपमा स्मरणीय रहनेछ ।

उता मोरक्को भने सन् २०२२ को विश्वकपमा गरेको ऐतिहासिक सेमिफाइनल यात्रालाई दोहोर्याउने लक्ष्यतर्फ थप एक कदम नजिक पुगेको छ । अब सेमिफाइनल प्रवेशका लागि मोरक्कोले क्वाटरफाइनलमा फ्रान्स र पाराग्वेबीच हुने खेलको विजेता फ्रान्ससँग प्रतिस्पर्धा गर्नेछ ।