मन्दिरको सामान चोरी गर्ने तीन युवक पक्राउ 

विराटनगर । मोरङको कानेपोखरीबाट मन्दिरको सामानसहित प्रहरीले तीन जना युवकलाई पक्राउ गरेको छ । कानेपोखरी गाउँपालिका–५ स्थित कानेपोखरी चोकबाट मन्दिरका बहुमूल्य सामग्रीहरू चोरी गर्ने गिरोहका तीन जनालाई प्रहरीले पक्राउ गरेको हो ।

मन्दिरका बहुमूल्य सामग्री मोरङको उर्लाबारी नगरपालिका–७ का ३१ वर्षीय दिवस दर्जी, २६ वर्षीय विवेक विश्वकर्मा र १८ वर्षीय अर्जुन दर्जीलाई पक्राउ गरेको मोरङ प्रहरीका प्रवक्ता डीएसपी मकेन्द्रकुमार मिश्रले जानकारी दिए ।

Advertisement

उनका अनुसार अस्थायी प्रहरी चौकी कानेपोखरीको टोलीले नियमित चेकिङका क्रममा शंका लागि सोधपुछ गर्दा उनीहरूको साथबाट चोरीका सामानसहित चोरीमा प्रयोग हुने औजारहरू बरामद गरेको हो ।

उनीहरूको साथबाट मन्दिरबाट चोरी गरिएका र चोरीमा प्रयोग गरिएका निम्न सामग्रीहरू बरामद गरेको छ । को ३४ प ५७७९ नम्बरको स्कुटर, नगद ६६५ रुपैयाँ, तामाको कलश ६० थान, तामाको दियो ४६ थान र घण्टी १२ थान, ढकी डलर ६२ थान र तामाको थाली ३ थान, ताला फुटाउन प्रयोग गरिने फलामको रड, हम्बर र पिलास उनीहरूको साथबाट बरामद भएको प्रहरीले जनाएको छ । ।

प्रहरीको प्रारम्भिक अनुसन्धानबाट उनीहरूले सावायोहाङ किराँत महिम मन्दिरबाट चोरी गरेको खुलेको डीएसपी मिश्रले बताए । पक्राउ परेका तीनै जनालाई इलाका प्रहरी कार्यालय पथरीमा राखेर घटनाकाबारे थप अनुसन्धान भइरहेको प्रहरीले जनाएको छ ।