मेचीनगरबाट दुई लाख ६६ हजार बराबरको सामान बरामद

झापा । झापाको मेचीनगर नगरपालिका–६ स्थित हनुमान मन्दिर क्षेत्रबाट प्रहरीले करिब दुई लाख ६६ हजार रुपैयाँ बराबरको अवैध सामान बरामद गरेको छ । भारतबाट भन्सार छली गरी नेपालतर्फ ल्याउँदै गरेको अवस्थामा ती सामग्रीहरू नियन्त्रणमा लिइएको झापा प्रहरीले जनाएको छ ।

झापा प्रहरीका प्रवक्ता डीएसपी रञ्जन अवाले बुधबार साँझ इलाका प्रहरी कार्यालय काँकडभिट्टाबाट खटिएको प्रहरी टोलीले उक्त सामान बरामद गरेको जानकारी दिए ।  उनका अनुसार बरामद गरिएका सामानहरूमा मोबाइलका विभिन्न सहायक सामग्री (एक्साेसेरिज) र बालबालिकाका कपडा रहेका छन् ।

Advertisement

बरामद गरिएका मोबाइल सामग्रीको बजार मूल्य दुई लाख ५५ हजार ४२५ रुपैयाँ र बालबालिकाको कपडाको मूल्य १० हजार ६०० रुपैयाँ गरी कुल दुई लाख ६६ हजार २५ रुपैयाँ बराबर रहेको छ ।

पक्राउ परेका सबै सामानहरूलाई आवश्यक कानुनी प्रक्रिया पूरा गर्नका लागि हाल इलाका प्रहरी कार्यालय काँकडभिट्टामा राखिएको प्रहरीले जनाएको छ। सीमा क्षेत्रमा हुने अवैध तस्करी नियन्त्रणका लागि प्रहरीले सक्रियता बढाएको डीएसपी अवाले बताए ।