कोशी प्रदेश प्रहरीको तीन वर्षे सफलता

विराटनगर । कोशी प्रदेश प्रहरी कार्यालय विराटनगरले पछिल्लो तीन आर्थिक वर्षमा अदालतको फैसला कार्यान्वयन, तस्करी नियन्त्रण र अपराध अनुसन्धानमा उल्लेख्य सफलता हासिल गरेको छ । कार्यालयले सार्वजनिक गरेको तथ्यांकअनुसार आर्थिक वर्ष २०८२/ ८३ मा मात्रै फैसला कार्यान्वयनका क्रममा १४ करोड १६ लाख रुपैयाँ राजस्व संकलन भएको छ ।

कोशी प्रदेश प्रहरीका प्रवक्ता एसएसपी योगेन्द्रसिंह थापाका अनुसार आ.व.  २०८२/ ८३ मा ४ हजार ६०३ जना फरार प्रतिवादी पक्राउ परेका छन् । यसअघि आ. व. २०८०/८१ मा २ हजार ३८५ फरार प्रतिवादी पक्राउ परी ८६ करोड ४८ लाख रुपैयाँ राजस्व संकलन भएको थियो भने आ.व. २०८१/८२ मा ३ हजार ५१३ फरार प्रतिवादी पक्राउ गरी १५ करोड १ लाख रुपैयाँ राजस्व संकलन भएको थियो ।

Advertisement

प्रहरीले तस्करी नियन्त्रणबाट पनि उल्लेख्य राजस्व संकलन गरेको छ । एसएसपी थापाका अनुसार भन्सार चोरी तस्करी शीर्षकमा आ.व.  २०८२/८३ मा २० करोड ४ लाख ५१ हजार रुपैयाँ राजस्व संकलन भएको छ । यस्तै, आ.व. २०८१/ ८२ मा २० करोड ४ लाख २० हजार रुपैयाँ र आ.व. २०८०/८१ मा १२ करोड ३८ लाख राजस्व संकलन भएको थियो ।

प्रहरी कार्यालयको मुद्दा दर्ता र पक्राउ पर्नेको संख्या सार्वजनिक गरेको छ । यसमा, आ.व. २०८२/८३ मा ९ हजार ८६३ मुद्दा दर्ता भएकोमा ७ हजार ४६८ जना पक्राउ परेका थिए । आ.व. २०८१/८२ मा ९ हजार ४६१ मुद्दा दर्ता भएकोमा ८ हजार १६० जना पक्राउ परे भने आ.व. २०८०/८१ मा ९ हजार ३८७ मुद्दा दर्ता भएकोमा ७ हजार ३०४ जनालाई प्रहरीले  पक्राउ गरेको थियो ।

त्यस्तै, पछिल्लो तीन वर्षको विभिन्न अपराधका घटनाको विधागत तथ्यांक अनुसार लागुऔषधतर्फ आ.व. २०८२/ ८३ मा १ हजार ३१३, आ.व. २०८१ / ८२ मा १ हजार ४३७ र आ.व. २०८० /८१ मा १ हजार ३९,  कर्तव्य ज्यान सम्बन्धी आ.व. २०८२/ ८३ मा ८४, आ.व. २०८१/८२ मा १०३ र आ.व. २०८०/८१ मा ११८, साइबर अपराधतर्फ आ.व. २०८२/८३ मा ४०, आ.व. २०८१ /८२ मा ३५ र आ.व. २०८०/८१ मा २४ थिए भने मानव बेचबिखनतर्फ आ.व. २०८२/८३ मा १५, आ.व. २०८१/८२ मा ११ र आ.व. २०८०/८१ मा ११ वटा मुद्दा दर्ता भएका प्रहरी कार्यालयले जनाएको छ ।

कोशी प्रदेश प्रहरीले अपराध नियन्त्रण र कानुनी फैसला कार्यान्वयनलाई थप प्रभावकारी बनाउँदै लगेको प्रवक्ता थापाले बताए ।