केरुङ क्षेत्रमा बाढीको कहर : ३१ जनाको मृत्यु, ५३१ अझै बेपत्ता

काठमाडौं । चीन–नेपाल सीमास्थित केरुङ (गिरोङ) क्षेत्रमा गएको पहिरोपछि आएको बाढीमा परी चीनतर्फ ३१ जनाको मृत्यु भएको पुष्टि भएको छ । ५३१ जना अझै बेपत्ता छन् ।

दक्षिण–पश्चिम चीनको सिजाङ स्वायत्त क्षेत्रमा अगस्ट २६ मा हिमपहिरोसहितको पहिरो गएपछि नदीमा आएको बाढीले ठूलो क्षति पुर्‍याएको हो । स्थानीय विपत् व्यवस्थापन तथा उद्धार केन्द्रका अनुसार शुक्रबार साँझ ६ बजेसम्म ३१ जनाको मृत्यु पुष्टि भएको छ ।

Advertisement

कमाण्ड सेन्टरका अनुसार उद्धारका क्रममा प्रभावित क्षेत्रबाट ९८७ वटा व्यक्तिगत सामानसमेत फेला परेका छन् । उद्धार तथा खोजी कार्यलाई थप प्रभावकारी बनाउन प्रभावित क्षेत्रमा विभिन्न निकायका विज्ञ तथा प्राविधिक टोली परिचालन गरिएको छ ।

जी–२१६ उद्धार मार्गमा गरिएको निरीक्षणका क्रममा ५८ वटा सम्भावित भूगर्भीय विपत्का स्थल पहिचान गरिएको छ । साथै, प्रभावित तीन गाउँमा सम्भावित जोखिमको निरीक्षण तथा जोखिम मूल्यांकन पूरा गरी दुईवटा अस्थायी आपतकालीन आश्रयस्थल निर्माणका लागि स्थानसमेत छनोट गरिएको छ ।

प्रभावित क्षेत्रमा आपतकालीन आपूर्ति व्यवस्थापनका लागि आवश्यक मार्गदर्शनसमेत गरिएको अधिकारीहरूले बताएका छन् । सम्भावित थप विपत्को जोखिम पहिचान र रोकथामका लागि मौसम, प्राकृतिक स्रोत, जलस्रोत तथा आपतकालीन व्यवस्थापनसँग सम्बन्धित अधिकारीहरू परिचालन भएका छन् ।

चाइनिज साइन्स एकेडेमी र चीन सुरक्षा विज्ञान तथा प्रविधि एकेडेमीका विज्ञसहित १७२ जना विशेषज्ञ तथा प्राविधिक जनशक्ति बुधबार दिउँसो ४ बजेसम्म प्रभावित क्षेत्रमा खटिएका थिए । हिमाली क्षेत्रमा बरफ–चट्टान पहिरोका कारण आएको बाढीले गिरोङ बन्दरगाह आसपासका भवन, विद्युत् आपूर्ति प्रणाली तथा गिरोङ बन्दरगाहतर्फ जाने जी–२१६ राजमार्गको एक खण्डमा क्षति पुर्‍याएको छ ।

सडक तथा पूर्वाधारमा भएको क्षतिका कारण उद्धार र राहत कार्यमा समेत कठिनाइ भएको अधिकारीहरूले बताएका छन् । कठिन भौगोलिक अवस्थाका बाबजुद चीनले उद्धारका लागि हेलिकोप्टर, स्पिडबोट र रबरका डुंगा परिचालन गरेको छ ।

केही उद्धार टोलीले करिब १२ घण्टा ठाडो पहाडी बाटो पैदल पार गर्दै प्रभावित क्षेत्रमा पुगेर खोज तथा उद्धार कार्य अघि बढाएका थिए । उद्धार अभियानमा करिब २ हजार ३०० जना उद्धारकर्मी, ४०० भन्दा बढी खोज तथा उद्धार सवारीसाधन, ८ हजारभन्दा बढी व्यावसायिक उपकरणका सेट, ८०० भन्दा बढी ड्रोन उडान तथा २४ हेलिकोप्टर उडान परिचालन गरिएको छ ।