छुट्टाछुट्टै आक्रमणमा २६ जनाको मृत्यु

एजेन्सी । सुडानको दक्षिण कोर्डोफान राज्यमा भएका दुई छुट्टाछुट्टै आक्रमणमा कम्तीमा २६ जनाको मृत्यु भएको छ भने दर्जनौँ घाइते भएका छन् । स्वयंसेवी संस्था सुडान डक्टर्स नेटवर्कका अनुसार बिहीबार दिउँसो काउडाको दक्षिण र पश्चिममा पर्ने डेबी र लुवैरी क्षेत्रमा सुडान पिपुल्स लिबरेसन मुभमेन्ट-नर्थ (एसपीएलएम-एन) का लडाकुले गरेको आक्रमणमा महिला तथा बालबालिकासहित २१ जनाभन्दा बढीको मृत्यु भएको थियो । घटनामा अन्य धेरै घाइते भएका छन् ।

त्यस्तै, शुक्रबार बिहान डिलिङ सहरमा एसपीएलएम–एनका लडाकुले गरेको तोप प्रहारबाट एक बालकसहित पाँच जनाको मृत्यु भएको र अन्य घाइते भएको सुडान डक्टर्स नेटवर्कले जनाएको छ । डिलिङका एक प्रत्यक्षदर्शीका अनुसार आवासीय क्षेत्रमा तोपका गोला प्रहार हुँदा सातभन्दा बढी घाइते भएका थिए ।

Advertisement

डेबीस्थित एक ग्रामीण अस्पतालका चिकित्सकीय स्रोतले सिन्ह्वालाई दिएको जानकारीअनुसार अस्पतालमा २० भन्दा बढी शव र ११ जना घाइते ल्याइएको थियो । आक्रमणपछि मानवीय अवस्था थप बिग्रने आशंकामा सर्वसाधारणले क्षेत्र छाड्न थालेका छन् ।

सुडान डक्टर्स नेटवर्कले डेबी र लुवैरीमाथिको आक्रमणको निन्दा गर्दै यो अगस्टको अन्त्यमा भएको युद्धविराम सम्झौताको उल्लङ्घन भएको जनाएको छ । संस्थाले आक्रमणमा सर्वसाधारणलाई लक्षित गरिएको आरोपसमेत लगाएको छ । एसपीएलएम–एनले भने उक्त आरोपबारे अहिलेसम्म कुनै प्रतिक्रिया दिएको छैन ।

सन् २०११ मा स्थापना भएको एसपीएलएम–एनले दक्षिण कोर्डोफान र ब्लु नाइल राज्यका केही क्षेत्रमा आफ्नो प्रभाव कायम राखेको छ । सुडानका कोर्डोफान राज्यहरूमा सरकारी सेना, अर्धसैनिक बल र विद्रोही समूहबीच लामो समयदेखि संघर्ष हुँदै आएको छ । सन् २०२३ अप्रिलमा सुरु भएको सुडानको व्यापक द्वन्द्व चौथो वर्षमा प्रवेश गरिसकेको छ । द्वन्द्वका कारण हजारौँ मानिसको मृत्यु भइसकेको छ भने लाखौँ मानिस देशभित्र र बाहिर विस्थापित भएका छन् ।