अमेरिकी राष्ट्रपतिको दुर्लभ कूटनीतिक शैली, सीलाई स्वागत गर्न विमानस्थलमै पुगे ट्रम्प

एजेन्सी । चिनियाँ राष्ट्रपति सी चिनफिङ अमेरिका पुगेका छन् । सीको अमेरिका आगमनसँगै अमेरिकी राष्ट्रपति डोनाल्ड ट्रम्पले उनलाई विमानस्थलमै पुगेर स्वागत गरेका छन् ।

उक्त स्वागतलाई अमेरिकी राष्ट्रपतिको दुर्लभ कूटनीतिक शैलीका रुपमा हेरिएको छ । जोइन्ट बेस एन्ड्रयुजमा सीको स्वागतका लागि ट्रम्पसँगै अमेरिकी प्रथम महिला मेलानिया ट्रम्प पनि उपस्थित थिइन् । चिनियाँ राष्ट्रपति सीसँग उनकी पत्नी पेङ लियुआन पनि अमेरिका पुगेकी छन् ।

Advertisement

विदेशी राष्ट्रप्रमुखलाई सामान्यतया ह्वाइट हाउसमै भेट्ने अमेरिकी राष्ट्रपतीय परम्पराभन्दा फरक ढंगले ट्रम्पले सीलाई विमानस्थलमै पुगेर स्वागत गरेका हुन् । सीको स्वागतका लागि अमेरिकी सेनाले विशेष समारोह आयोजना गरेको थियो ।

समारोहमा सैन्य ब्यान्ड, गार्ड अफ अनर तथा अमेरिकी सैन्य विमानको प्रदर्शन गरिएको थियो । बी–१ बम्बर विमानले आकाशमा फ्लाइपास्टसमेत गरेको थियो ।

सीको अमेरिका भ्रमणका क्रममा बिहीबार ट्रम्पसँग द्विपक्षीय भेटवार्ता हुने कार्यक्रम छ । भेटवार्तामा दुई देशबीचको व्यापार सम्बन्ध, भन्सार महसुल र कृत्रिम बुद्धिमत्ता (एआई) लगायतका विषयमा छलफल हुने अपेक्षा गरिएको छ ।

अमेरिका र चीनबीच व्यापार तथा अन्य रणनीतिक विषयमा मतभेद रहँदै आएका बेला सीको अमेरिका भ्रमणलाई दुई देशबीचको उच्चस्तरीय संवादका रूपमा हेरिएको छ ।