भारी वर्षापछि लामो दूरीका बस सेवा प्रभावित

धनगढी । सुदूरपश्चिमका पहाडी जिल्लाबाट धनगढी आउने तथा धनगढी हुँदै अन्यत्र जाने लामो दूरीका सार्वजनिक बस सेवा प्रभावित भएका छन्। भारी वर्षा, बाढी र पहिरोको जोखिम बढेपछि यातायात व्यवसायीले लामो दूरीका बस सञ्चालनमा रोक लगाएपछि यात्रुहरू समस्यामा परेका छन्।

विभिन्न यातायात समितिले आज (शुक्रबार) देखि आइतबारसम्म लामो दूरीका बस सञ्चालन नगर्ने निर्णय गरेका छन्। पहाडी क्षेत्रबाट काठमाडौँ, पोखरा लगायत पूर्वतर्फ जाने बससमेत तत्काल सञ्चालन नगर्ने निर्णय गरिएको छ।

Advertisement

लामो दूरीका बस सेवा बन्द भएपछि यात्रुहरू छोटो दूरीमा चल्ने सवारीसाधनमार्फत गन्तव्यतर्फ जान बाध्य भएका छन्। कतिपय रुटमा छोटो दूरीका सवारीसाधनसमेत पर्याप्त नहुँदा यात्रुले थप सास्ती खेप्नुपरेको बताएका छन्।

सरकारले सम्भावित विपद्को जोखिमलाई ध्यानमा राख्दै लामो दूरीका सवारीसाधन सञ्चालनमा सावधानी अपनाउन आग्रह गरेपछि यातायात व्यवसायीले पनि सेवा स्थगित गरेका हुन्।

सुदूरपश्चिम यातायात प्रालिका कोषाध्यक्ष गोविन्द शाहका अनुसार बिहीबारदेखि नै लामो दूरीका रात्रिबस सञ्चालनमा रोक लगाइएको थियो। शुक्रबार बिहानदेखि सुदूरपश्चिमका विकट तथा पहाडी क्षेत्रमा जाने बससमेत सञ्चालन नगर्ने निर्णय गरिएको उनले बताए।

‘सरकारको निर्देशन र मौसमको अवस्थालाई ध्यानमा राखेर तत्कालका लागि लामो दूरीका बस सञ्चालन नगर्ने निर्णय गरिएको हो। जोखिम कम भएका जिल्लामा भने वर्षाको अवस्था हेरेर सेवा सञ्चालन गर्नेछौँ,’ उनले भने।

सुदूरपश्चिम यातायातले धनगढीबाट काठमाडौँ र पोखरातर्फ जाने रात्रिबस दुई दिनका लागि सञ्चालन नगर्ने जनाएको छ। धनगढीबाट पोखरातर्फ दैनिक दुई तथा काठमाडौँका लागि १३ वटा रात्रिबस सञ्चालन हुँदै आएका थिए। मौसम प्रतिकूल भएपछि ती बस गन्तव्यतर्फ पठाइएको छैन।

यातायात व्यवसायीहरूले खराब मौसमका कारण लामो दूरीको यात्रामा जोखिम बढ्न सक्ने भएकाले यात्रु र चालकको सुरक्षालाई ध्यानमा राखेर सेवा स्थगित गरिएको बताएका छन्। मौसममा सुधार आएपछि मात्रै बस सेवा नियमित गरिने उनीहरूको भनाइ छ।