इलाममा आयोजित ५ किलोमिटर दौड प्रतियोगितामा आयुष्मा र रितिक प्रथम

इलाम । बालबालिकाको क्षमता, सहभागिता र नेतृत्व विकासलाई प्रोत्साहन गर्ने उद्देश्यले इलाममा ५ किलोमिटर दौड प्रतियोगिता सम्पन्न भएको छ। ज्योति विद्या मन्दिर बाल क्लबको आयोजना तथा इलाम नगरपालिका–८ को सहकार्यमा भएको प्रतियोगितामा १३ विद्यालयका ५६ विद्यार्थी सहभागी भएका थिए ।

तिल्केनीबाट सुरु भएको दौड जिरो किलोमिटर, ठूलो टुँडिखेल, चोक बजार र धोबीधारा हुँदै पुनः तिल्केनीमै पुगेर सम्पन्न भएको थियो ।

छात्रातर्फ आयुष्मा राई प्रथम, खुसी गुरुङ द्वितीय, रबिना नेपाली तृतीय र सञ्जना सुवेदी सान्त्वना भइन्। यस्तै, छात्रतर्फ रितिक राई प्रथम, आनन्द सुवेदी द्वितीय, आर्यन बेगा तृतीय र प्रितम राईले सान्त्वना पुरस्कार पाए।

प्रतियोगिताका विजेताले नगद पुरस्कारसहित ट्रफी, मेडल र प्रमाणपत्र प्राप्त गरेका छन्। आयोजकले बालबालिकामा खेलकुदप्रतिको रुचि बढाउनुका साथै उनीहरूको आत्मविश्वास, नेतृत्व क्षमता र सहभागिता अभिवृद्धि गर्ने उद्देश्यले प्रतियोगिता आयोजना गरिएको जनाएको छ।