युरोपेली राजनीतिक समुदायको शिखर सम्मेलन सुरु

एजेन्सी । युरोपेली मुलुकहरूबीच क्षेत्रीय सुरक्षा, आर्थिक प्रतिस्पर्धात्मकता र साझा चुनौतीबारे छलफल गर्ने उद्देश्यले युरोपेली राजनीतिक समुदाय (ईपीसी) को नवौँ शिखर सम्मेलन आयरल्यान्डको राजधानी डब्लिनमा सुरु भएको छ ।

बिहीबारदेखि सुरु भएको सम्मेलनमा युरोपका करिब ५० देशका राष्ट्र तथा सरकार प्रमुख र उच्चस्तरीय प्रतिनिधिहरू सहभागी छन् । डब्लिनस्थित कन्भेन्सन सेन्टरमा आयोजित सम्मेलनको सहअध्यक्षता आयरल्यान्डका प्रधानमन्त्री माइकल मार्टिन र युरोपेली परिषद्का अध्यक्ष एन्टोनियो कोस्टाले गरिरहेका छन् ।

‘बलियो, सुरक्षित र जोडिएको युरोप’ नारासहित आयोजना गरिएको सम्मेलनमा युरोपको आर्थिक प्रतिस्पर्धात्मक क्षमता अभिवृद्धि, नवीन प्रविधिको विकास, ऊर्जा सहकार्य र क्षेत्रीय सुरक्षा मजबुत बनाउने विषयमा छलफल भइरहेको छ ।

विशेषगरी विदेशी हस्तक्षेप तथा विभिन्न माध्यमबाट हुने अप्रत्यक्ष र मिश्रित आक्रमणबाट युरोपलाई सुरक्षित राख्ने विषय सम्मेलनको प्राथमिकतामा परेको छ । बदलिँदो अन्तर्राष्ट्रिय परिस्थितिमा युरोपेली मुलुकबीच सुरक्षा सहकार्य र सामूहिक प्रतिरक्षा क्षमता बढाउने विषयमा पनि नेताहरूले छलफल गर्ने अपेक्षा गरिएको छ ।

सम्मेलनको अर्को प्रमुख एजेन्डा रुस–युक्रेन युद्ध बनेको छ । युद्ध अन्त्यका लागि कूटनीतिक प्रयासहरू पुनः अघि बढिरहेका बेला युरोपेली नेताहरूले यस विषयमा साझा धारणा निर्माण तथा आपसी समन्वयलाई प्राथमिकता दिने अपेक्षा गरिएको छ ।

सम्मेलनमा युक्रेनी राष्ट्रपति भोलोदिमिर जेलेन्स्कीसहित युरोपेली संघका सदस्य तथा गैरसदस्य राष्ट्रका प्रतिनिधिहरू सहभागी छन् । क्यानडाका प्रधानमन्त्री मार्क कार्नी पनि अतिथिका रूपमा सम्मेलनमा उपस्थित भएका छन् । उनको सहभागिताले युरोपेली संघबाहिरका मुलुकसँग राजनीतिक संवाद र सहकार्य विस्तार गर्ने मञ्चका रूपमा ईपीसीको महत्त्वलाई थप उजागर गरेको छ ।

यसैगरी, उत्तर एटलान्टिक सन्धि सङ्गठन (नेटो) का महासचिव मार्क रुटेले पनि सम्मेलनका क्रममा युरोपेली नेताहरूसँग द्विपक्षीय भेटवार्ता गर्ने कार्यक्रम छ । नेटोका अनुसार उनले युक्रेनी राष्ट्रपति जेलेन्स्कीसँग समेत भेट गर्नेछन् । महासचिव रुटेले सम्मेलनका क्रममा सञ्चारकर्मीसँग पनि कुराकानी गर्ने कार्यक्रम रहेको छ ।

सन् २०२२ मा स्थापना भएको युरोपेली राजनीतिक समुदाय युरोपेली संघका सदस्य तथा गैरसदस्य सबै युरोपेली मुलुकबीच राजनीतिक संवाद र सहकार्य प्रवर्द्धन गर्ने अनौपचारिक मञ्च हो । यसले क्षेत्रीय सुरक्षा, राजनीतिक स्थिरता र साझा चुनौतीको सामना गर्न युरोपेली मुलुकहरूलाई एउटै मञ्चमा ल्याउने उद्देश्य राखेको छ ।

डब्लिनमा जारी शिखर सम्मेलनपछि शुक्रबार युरोपेली संघका सदस्य राष्ट्रका सरकार तथा राष्ट्रप्रमुखहरूको अनौपचारिक बैठकसमेत आयोजना हुँदैछ । उक्त बैठकमा युरोपेली संघका आगामी रणनीतिक प्राथमिकता तथा साझा चुनौतीबारे छलफल हुने अपेक्षा गरिएको छ ।