नोबेलले विस्तार गर्यो क्यान्सरको उपचार सेवा

विराटनगर । विराटनगरको नोबेल शिक्षण अस्पतालले क्यान्सर रोगको उपचार सेवालाई थप विस्तार गरेको छ ।

क्यान्सरको उपचारका लागि निर्मित नयाँ भवनमा रेडिएसन थेरापी सेवा सुरु गरिएको अस्पतालका महाप्रबन्धक दिपेश राईले बताए । ३ अर्ब लगानीमा रेडिएसन थेरापीका लागि बङ्करसहितको भवन र अत्याधुनिक उपकरणहरुको व्यवस्था गरिएको जानकारी उनले दिए ।

यससँगै, नोबेलमा दैनिक बहिरंग सेवा, दिवा हेरचाह, भर्ना भएका बिरामीको उपचार गरिने अन्तरंग सेवा, किमोथेरापी, रेडिएसन थेरापी, शल्यक्रियालगायतका सम्पूर्ण सेवाहरु उपलब्ध हुने महाप्रबन्धक राईको भनाइ छ । उनका अनुसार मुलुकमा पहिलोपटक भेरिएन कम्पनीको एज नामक रेडिएसन थेरापीको अत्याधुनिक उपकरण, ब्राकीथेरापी, सिमेन्स कम्पनीको सोमाटोम गोसिम आरटीसीटी मेसिनलगायत अत्याधुनिक उपकरणहरुबाट रेडिएसन थेरापी सुरु गरिएको छ ।

अस्पतालका क्यान्सर रोगका विशेषज्ञ डा. प्रदीप भण्डारीका अनुसार रेडिएसन थेरापीको लागि जडान भएको एज कम्पनीको उपकरणमा रहेको सिक्स डी काउच, हाइपर आर्क, एचडीएमआईसी, पछिल्लोसमयको अत्याधुनिक प्रविधि हो। ती उपकरणमा रहेको एसआरएस एसबीआरटीले शरीरभित्रको क्यान्सर शल्यक्रियाबिनानै निर्मूल गर्ने जानकारी उनले दिए ।

त्यसैगरी, आइजीआरटी, आइएमआरटी भिम्याटले शरीरभित्रको सामान्य र स्वस्थ्य कोषलाई क्षति नपुर्याइ क्यान्सर सेक्ने डा. भण्डारीको भनाइ छ । जसले हाल जडान गरिएको रेडिएसन थेरापीलाई थप प्रभावकारी र सटिक बनाउने उनले बताए ।

क्यान्सरको उपचारलाई सहज बनाउन नेपाल सरकारको विपन्न नागरिक औषधि उपचार कोषअन्तर्गत क्यान्सर रोगको उपचार सेवा पनि प्रदान गर्न नोबेल सूचीकृत भइसकेको अस्पतालका महाप्रबन्धक राईले बताए ।