
काठमाडौं । काठमाडौंमा जारी एन्फा महिला लिगमा कोशी प्रदेश र वालिङ नगरपालिका दोस्रो चरणमा प्रवेश गरेका छन् ।
प्रतियोगिताअन्तर्गत आज भएको खेलमा कोशी प्रदेशले सुदूरपश्चिम प्रदेशलाई ४–० गोलले पराजित गरेको हो ।
कोशीका लागि समिक्षा मगरले २ गोल, ममता राउत र कुस्मा राईलेले समान १–१ गोल गरे ।
९ खेलबाट १४ अंकका साथ कोशी प्रदेश पाँचौं स्थानमा पर्न सफल भएको छ । अंकविहीन हुँदै सुदूरपश्चिम पहिलो चरणबाट बाहिरियो ।
त्यस्तै, अर्को खेलमा वालिङ नगरपालिकाले चन्द्रपुर नगरपालिकालाई २–१ गोल अन्तरमा पराजित गर्दै अंक तालिकामा चौथो हुँदै दोस्रो चरणमा स्थान ओगटेको छ ।
वालिङका लागि सुक्रिया मिया र ज्याकलिन नसालीले गोल गरे । सुनिता सुनारले चन्द्रपुरका लागि गोल गरिन् ।
वालिङले ९ खेलबाट १५ अंक बनायो भने समान खेलबाट चन्द्रपुरले ८ अंक मात्रै बनाउँदै पहिलो चरणबाट बाहिरियो ।
यसअघि नै विभागीय टोली नेपाल पुलिस, त्रिभूवन आर्मी र एपिएफ दोस्रो चरणमा प्रवेश गरिसकेका छन् ।



















