
पोखरा । सहकारी ठगी प्रकरणमा पक्राउ परेका पूर्वगृहमन्त्री एवं राष्ट्रिय स्वतन्त्र पार्टी (रास्वपा)का सभापति रवि लामिछानेले थप १५ दिन प्रहरी हिरासतमै रहनुपर्ने भएको छ ।
लामिछानेलाई थप १५ दिन हिरासतमै राखेर अनुसन्धान अघि बढाउनका लागि जिल्ला अदालत कास्कीले आइतबार अनुमति दिएको हो । न्यायाधीश हिमलाल बेल्बासेको इजलासले थप अनुसन्धानका हिरासतमा राख्न प्रहरीलाई अनुमति दिएको हो ।
यसअघि कार्तिक २५ गते अदालतले १३ दिन हिरासतमा राख्न अनुमति दिएको थियो । उनीमाथि पोखराको सूर्यदर्शन सहकारीको रकम गोरखा मिडिया नेटवर्कमा लगेर अपचलन गरेको आरोप छ । लामिछाने कात्तिक २ गते काठमाडौंबाट पक्राउ परेका हुन् ।
पोखरा लगेर उनीमाथि अनुसन्धान भइरहेको छ । प्रहरीले लामिछानेविरुद्ध किर्तेसहित संगठित अपराधमा समेत अनुसन्धान गरिरहेको छ ।
कास्की अदालतबाट म्याद थप गरेलगत्तै उनलाई काठमाडौं लैजाने तयारी छ । काठमाडौंको कालीमाटीस्थित स्वर्णलक्ष्मी बहुउद्देश्य सहकारीको रकम अपचलन गरेको आरोपमा काठमाडौं जिल्ला अदालत काठमाडौंले पक्राउ पुर्जी जारी गरेको छ।
लामिछानेका व्यावसायिक साझेदार नेपाल प्रहरीका पूर्वडीआईजी छविलाल जोशीलाई काठमाडौंमा बयान लिइसकिएको छ । लामिछानेविरुद्ध भने सहकारी ठगीमा चितवनामा समेत उजुरी परेको छ । गोरखा मिडिया नेटवर्कमा देशभरिका ९ वटा सहकारीको रकम अपचलन भएको प्रारम्भिक निष्कर्ष छ ।

























