
काठमाडौं । सहकारीको बचत अपचलन आरोपमा राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामिछानेले दुई जिल्लामा एक करोड २५ लाख धरौटी बुझाएका छन् । अझै दुई जिल्लामा उनीविरुद्धको मुद्दाको अनुसन्धान जारी छ ।
बिहीबार पोखराको सूर्यदर्शन बचत तथा ऋण सहकारी संस्थाको बचत अपचलन, संगठित अपराध र सम्पति शुद्धिकरण मुद्दामा जिल्ला अदालत कास्कीको आदेशपछि लामिछानेले ६५ लाख धरौटी बुझाएका थिए ।
बुधबार काठमाडौंको स्वर्णलक्ष्मी बचत तथा ऋण सहकारी संस्थाको बचत अपचलन मुद्दामा ६० लाख धरौटी बुझाएका हुन् ।
बिहीबार कास्कीमा धरौटी बुझाएर छुटेका लामिछाने आइतबार स्वर्णलक्ष्मी बचत तथा ऋण सहकारी संस्थाको बचत अपचलन मुद्दाको बयानका लागि हाजिर भएका थिए ।
तीन दिन न्यायीक हिरासतमा बसेका लामिछानेलाई थुनछेक बहसपछि जिल्ला अदालत, काठमाडौंका न्यायाधीश माधवप्रसाद अधिकारीको इजलसाले ६० लाख धरौटीमा छाड्ने आदेश दिएको थियो । आदेशपछि ६० लाख बराबरको बैंक ग्यारेन्टी बुझाएर लामिछाने हिरासतमुक्त भएका थिए । पोखरामा पनि उनी बैंक जमानत बुझाएर छुटेका थिए ।
इलाका प्रहरी कार्यालय, बुटवलले सुप्रिम सहकारी ठगीमा अनुसन्धान गरेर लामिछानेलाई प्रतिवादी बनाउनु पर्ने रायसहितको अनुसन्धान प्रतिवेदन सरकारी वकिलको कार्यालयमा बुझाइसकेको छ । जिल्ला प्रहरी कार्यालय, चितवनले पनि उनी जोडिएको साहारा चितवन सहकारी प्रकरणमा अनुसन्धान गरिरहेको छ । दुई जिल्लामा उनी आफै अदालतमा उपस्थित हुनेछन् ।
बुधबार काठमाडौंको स्वर्णलक्ष्मी सहकारीमा बचतकर्ताले राखेको १ अर्ब १९ करोड रुपैयाँ अनियमितता प्रकरणमा रास्वपा सभापति लामिछाने ‘कसुरदार छैनन् भन्न सकिएन’ भन्दै धरौटीमा छाड्न काठमाडौं जिल्ला अदालतले आदेश दिएको थियो ।
बुधबार छुटेपछि लामिछानेले न्यायालयलाई धन्यवाद दिएका छन् । ‘न्याय प्रक्रियालाई सघाउन आएको भनेको थिएँ । अदालतप्रति एकदमै सम्मान व्यक्त गर्न चाहन्छु’, उनले भनेका छन्, ‘न्यायप्रेमी जनतालाई धन्यवाद दिन चाहन्छु ।’

























