
विराटनगर । मोरङको सुनवर्षी नगरपालिका–४ काशीजान टोलस्थित नालीमा टाउको डुबेको अवस्थामा बुधबार बिहान एक जना पुरुषको शव फेला परेको छ ।
सुनवर्षी–४ खिर्कीडाँगीका अन्दाजी ५५ वर्षीय कात्तिकलाल सुतिहार मृत फेला परेको मोरङ प्रहरीका प्रवक्ता डीएसपी वेदप्रकाश जोशीले जानकारी दिए । उनका अनुसार शव फेला परेको भनेर बिहान ८ः३० बजेतिर प्रहरीलाई घटनाको जानकारी आएको हो ।
सडकको नालीमा टाउको डुबेको अवस्थामा शव र घटनास्थलमा साइकलसमेत फेला परेको जोशीले बताए। काशीजान टोलबाट साइकलमा खिर्कीडाँगीस्थित घरतर्फ फर्कने क्रममा मंगलबार राति घटना भएको हुनसक्ने प्रहरीको प्रारम्भिक अनुमान छ ।
‘घटनाको प्रकृति हेर्दा रातको समयमा हिलाम्य सडकमा साइकल चिप्लिएर टाउको नालीमा बज्रदा घटना भएजस्तो देखिन्छ । टाउको नालीमा बज्रिएपछि उठ्न नसकेको हो कि भन्ने हो । नालीमा करिब २–३ फिट पानी जमेको रहेछ । त्यही पानीमा टाउको डुबेको अवस्थामा शव फेला परेको हो,’ प्रहरी स्रोतले भन्यो । प्रहरीका अनुसार घटनास्थलमै लडिरहेको अवस्थामा साइकल फेला परेको थियो ।
इलाका प्रहरी कार्यालय रंगेलीका इन्स्पेक्टर सन्तोषकुमार खड्का नेतृत्वको टोलीले कानुनी प्रक्रिया पूरा शवलाई घटनास्थलबाट उठाएर पोस्टमार्टमका लागि रंगेली अस्पताल पठाएको छ । घटनाको कारण खुल्न बाँकी रहेको र थप अनुसन्धान अघि बढाइएको डीएसपी जोशीले बताए ।

























