
विराटनगर । ताप्लेजुङको पाथीभरा (मुक्कुमलुङ)मा केबलकारको विरोध गरिरहेको समूह र सरकारी वार्ता टोलीबीच वार्ता सुरु भएको छ ।
केबलकार निर्माणको विरोध गरिरहेका आन्दोलनकारीका तर्फबाट गठित वार्ता समन्वय टोली र सरकारले गठन गरेको वार्ता टोलीबीच काठमाडौंमा वार्ता भइरहेको हो । सरकारी वार्ता टोलीको नेतृत्व गृह मन्त्रालयका सहसचिव प्रेमप्रसाद भट्टराईले गरेका छन् । आन्दोलनरत पक्षको नेतृत्व संयोजक अमर तुम्याहाङले गरेका छन् ।
‘अहिले हामी सरकारी वार्ता टोलीसँग छलफलमै छौं’, तुम्याहाङले भनेका छन्,‘ सरकारी टोलीसँग वार्ता चलिरहेको छ ।’ सरकारले आइतबार गृह मन्त्रालयका सहसचिव प्रेमप्रसाद भट्टराईको नेतृत्वमा वार्ता समिति गठन गरेको थियो ।
आन्दोलनरत पक्षले सोमबार वार्ता समिति गठन गरेको थियो । आन्दोलनरत पक्षको वार्ता टोलीमा राम मादेन र सरु सिङ्घक, शंकर सुब्बा सदस्य छन् ।

























