बुढासुब्बा गोल्डकपको उपाधिमा एनआरटीको ह्याट्रिक

Share this
693shares
मुलुकी खबर
मुलुकी खबर
clock२०८१ माघ २६, शनिबार २०:०१

धरान । काठमाडौंको न्युरोड टिम (एनआरटी)ले २५ औं बुढासुब्बा गोल्डकपको जितेसँगै उपाधिमा ह्याट्रिक गरेको छ ।

धरानमा शनिबार (आज) सम्पन्न भएको फाइनल खेलमा एनआरटीले चर्च ब्वाइज युनाइटेडलाई २–१ गोलमा हराउँदै उपाधिमा ह्याट्रिक गर्न सफल भएको हो । एनआरटीले १० औं र २४ औं संस्करणको उपाधि जितेको थियो ।

उपाधिसँगै एनआरटीले नगद १० लाख पुरस्कार प्राप्त गर्दा उपविजेता भएको चर्च ब्वाइजले नगद ५ लाख पुरस्कार जितेको छ । प्रतिस्पर्धात्मक खेलमा अग्रता भने चर्च ब्वाइजले लिएको थियो ।

खेलको २४ औं मिनेटमा रोहन कार्कीको फ्रिकिकलाई कप्तान अनन्त तामाङले हेड गोल गरेका थिए । 

गोल खाएको तीन मिनेट नबित्दै एनआरटीले बराबरी गर्यो । २७ औं मिनेटमा एनआरटीका रोबर्टले प्रहार गरेको कर्नरमा चर्च ब्वाइजका गोलकिपर क्रिसल मोक्तानले पञ्च गर्न नसक्दा डिबक्सभित्र रुमल्लिएको बललाई हेनरी पोकोले जाली चुमाएका थिए । उनै हेनरीले नै एनआरटीका लागि दोस्रो गोल गरे । 

५८ औं मिनेटमा चर्च ब्वाइजका डिफेन्स डिका सेर्गेबाट बल खोस्दै उनले उत्कृष्ट गोल गरे । खेलको म्यान अफ द म्याच एनआरटीका हेनरी पोकोले नगद १० हजार पुरस्कार प्राप्त गरे । 

चर्च ब्वाइज भने पहिलो पटक बुढासुब्बा गोल्डकपको फाइनलमा पुगेको हो । यो सिजनमा एनआरटी र चर्च ब्वाइज ४ वटा प्रतियोगितामा आमने सामने हुँदा ३ वटा प्रतियोगिताको फाइनलमा यी २ टोलीले उपाधिका लागि खेलेका छन् ।

बुढासुब्बा गोल्डकप र इलाम गोल्डकपको उपाधि भिडन्तमा एनआरटीले चर्च ब्वाइज पराजित गर्यो भने चर्च ब्वाइजले झापा कपको उपाधि भिडन्तमा एनआरटीलाई पराजित गरेको थियो ।

प्रतियोगिताको सर्वोत्कृष्ट खेलाडी एनआरटीका शिशिर लेखीले नगद १ लाख पुरस्कार पाए । हाई स्कोर चर्च ब्वाइजका खेलाडीद्वय समिर तामाङ र अर्माण्ड भिदोंग भए । उनीहरूलाई नगद ३५ हजार प्रदान गरियो । 

त्यस्तै, बेष्ट गोलकिपर एनआरटीका प्रमिजय गच्छदार, बेष्ट कोच एनआरटीका हरिओम श्रेष्ठ, बेष्ट फरवार्ड चर्च ब्वाइजका समिर तामाङ, बेष्ट डिफेन्डर चर्च ब्वाइजका पदम भट्टराई, बेष्ट मिड फिल्डर चर्च ब्वाइजका रोहन कार्की भए । उनीहरूलाई जनही नगद २५  हजार पुरस्कार प्रदान गरिएको थियो ।

प्रतियोगिताको २५ औं संस्करण पूरा भएको अवसरमा आयोजक धरान फुटबल क्लबबाट पहिलो संस्करण खेलेका खेलाडीहरूलाई सम्मानपत्र तथा दोसल्ला ओढाएर सम्मान गरिएको थियो ।

त्यस्तै, पहिलो संस्करणबाट निरन्तर गोल्डकपको समाचार लेखेका बरिष्ठ पत्रकार हर्ष सुब्बालाई नगद  ११ हजारसहित सम्मान गरिएको थियो ।

बुढासुब्बा गोल्डकपका संस्थापक २०५५ सालदेखि २०८० सालसम्म धरान फुटबल क्लबको अध्यक्ष रहेका किशोर राईलाई समेत नगद ५१ हजारसहित सम्मान गरेको थियो ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.