
ताप्लेजुङ । पाथीभरामा केबलकार निर्माण विवाद उत्कर्षमा पुगेका बेला ताप्लेजुङका जनप्रतिनिधि निर्माणको पक्षमा उभिएका छन् । पहिचान, धर्म, संस्कार र संस्कृतिमा असर नगर्ने भन्दै केबलकार निर्माणको पक्षमा उभिएका हुन् ।
सोमबार फुङलिङमा पत्रकार सम्मेलन गर्दै जनप्रतिनिधिले केबलकार निर्माणमा ‘जिल्लावासीको विरोध छ भनेर भ्रम फैलाएको गुनासो गरे । उनीहरूले जिल्लावासी र जनप्रतिनिधि केबलकारकाे विपक्षमा नरहेको बताए ।
फुङलिङ नगरपालिकाका मेयर अमिर मादेनसहित वडाअध्यक्षले ‘नो केबलकार समूह’मा जिल्ला बाहिरका केही व्यक्ति सक्रिय रहेको बताए । जिल्ला बाहिरका केबलकार विरोधी पक्षले जिल्ला आन्दोलन गरिरहेको उनीहरुको भनाइ छ ।
तीन दशकअघि देखि पाथीभरामा केबलकार निर्माणको चर्चा सुरु भएको थियो । केबलकारको पक्षमा सुरु देखि नै जिल्लाका नागरिक रहेको उनीहरुको दाबी छ । केबलकार बनेपछि पाथीभराको जिल्लाको विकास हुने उनीहरुको भनाइ छ ।
ताप्लेजुङको विकासका विषयमा देश विदेशबाट चासो राख्नु सकरात्मक भएपनि केबलकारको विषयमा अनावश्यक भ्रम फैलिएको मेयर मादेनले बताए । उनले ताप्लेजुङका नागरिक केबलकारको सँधै पक्षमा रहेको दाबी गरे ।

























