
विराटनगर । विराटनगरमा जारी प्रदेश स्तरीय टी २० क्रिकेट प्रतियोगिताको दोस्रो दिन मोरङ र आयोजक मिल्स क्रिकेट क्लब एन्ड एकेडेमी विजय भएका छन् ।
प्रतियोगिताअन्तर्गत बुधबार (आज) गिरिजाप्रसाद कोइराला क्रिकेट रंगशालामा भएको पहिलो खेलमा मोरङ जिल्लाले उदयपुर जिल्लालाई ५० रनले पराजित गरेको छ ।
टस जितेर पहिले ब्याटिङ थालेको मोरङले १९ ओभर ६ बलमा सबै विकेटको क्षतिमा १ सय १९ रनको चुनौती प्रस्तुत गरेको थियो । दीपक पासवानले २९ रन, सन्तोष चौधरीले १८ रन बनाए ।
बलिङमा उदयपुरका तेज आचार्य र नवराज सिग्देलले समान ३–३ विकेट लिए ।
१ सय २० रनको लक्ष्य पछ्याएको उदयपुरले १९ ओभर ३ बलमा सबै विकेट गुमाउँदै ६९ रनमै समेटियो । पर्वत राईले १५ रन, नवराज सिग्देलले ११ रन र निराजन तिवारीले १० रनको योगदान दिए ।
मोरङका मिनाश थापाले ४ विकेट र अमर यादवले ३ विकेट लिए । थापा प्लेयर अफ म्याच हुँदै २ हजार ५ सय प्राप्त गरे ।
त्यसैगरी, आजै भएको दोस्रो खेलमा आयोजकले सुनसरीलाई ६ विकेटले पराजित गर्यो । टस जितेर पहिलो ब्याटिङ थालेको सुनसरीले १९ ओभर ६ बलमा सबै विकेट गुमाउँदै १ सय १७ रनको योगफल बनायो । सोनु मण्डलले ३४ रन र रितेश रोयले २८ रन बनाए ।
आयोजकका जोशक खड्काले ५ विकेट, विधान गोस्वामीले ३ विकेट तथा प्रशान्त साह र कृष्णले समान १–१ विकेट लिए ।
आयोजकले पाएको १ सय १८ रनको विजय लक्ष्य २० ओभरमा ४ विकेट गुमाउँदै जित निकाल्यो । निरु मुखियाले ३६ रन, मुकुन्द यादवले २५ रन र जोशक खड्काले १५ रनको योगदान दिए ।
सुनसरीका हार्दिक, गौरव कटुवाल, सिरयान यादवले समान १–१ विकेट लिए । आयोजकका जोशक खड्का प्लेयर अफ द म्याच हुँदै २ हजार ५ सय प्राप्त गरे ।
प्रतियोगिताअन्तर्गत बिहीबारको पहिलो खेल मोरङ र इलामबीच तथा दोस्रो खेल सुनसरी र झापाबीच हुनेछ ।
बुधबारसम्मको अंक तालिकामा मोरङ, आयोजक र उदयपुरले समान २–२ अंक जोडेका छन् ।



















