
विराटनगर । विराटनगरमा जारी चौथोँ संस्करणको ‘इक्युवालिटी कप क्रिकेट २०२५’ को उपाधिका लागि मोरङ र सप्तरी भिड्ने भएका छन् ।
प्रतियोगिताको अन्तिम लिग खेलमा सप्तरीलाई माेरङले पराजित गरेकाे हाे । लिग चरणको खेलमार्फत मोरङ र सप्तरी यसअघि नै फाइनलमा प्रवेश गरेका थिए । मोरङले खेलेको तीनै खेलमा जित हात पार्दै ६ अंक जोडेको छ भने सप्तरीले ३ मा २ खेलमा जित हात पार्दै ४ अंककासाथ दोस्रो स्थानमा रहेको छ । उपाधिका लागि दुई टाेलीबीचकाे खेल बिहीबार हुनेछ ।
नेपाल क्रिकेट फाउण्डेशनको आयोजनामा विराटनगर– ६ मा रहेको म्यारिलिबोन ज्वाला क्रिकेट मैदानमा बुधबार भएको खेलमा मोरङले सप्तरीलाई ७ विकेटले पराजित गर्दै अपराजित हुँदै शिर्ष स्थानमा पुगेकाे हाे ।
टस जितेर ब्याटिङ गरेको सप्तरीले निर्धारित २० ओभरमा ४ विकेट गुमाई ८१ रन जोडेको छ । सप्तरीकी साक्षी यादवले सर्वाधिक अविजित ४२ रन जोडीन् । मोरङकी निरु राजवंशीले १ विकेट लिँदा फुलकुमारी राजवंशी र बन्धना राजवंशी र क्रितीषा राजवंशीले १–१ विकेट लिइन् ।
८२ रनको लक्ष्य पछ्याएको मोरङले १० दशमलव ५ बलमा ३ विकेट गुमाई सो विजयी लक्ष्य पार गरेको थियो । मोरङको जितमा प्लेयर अफ द म्याच टिका साहले ४१ रन बनाउँदा प्रिन्साा राना मगरले अविजित १५ रनको योगदान दिइन् । टिकाले ३० बलमा ६ चौका प्रहार गरिन् । सप्तरीकी दिपा रामले २ विकेट लिइन् ।
यसअघि भएको पहिलो खेलमा सिरहाले इलामलाई १ सय ३३ रनको पराकिलो अन्तरले पराजित गर्दै प्रतियोगितामा पहिलो जित हात पारेको थियो । दुवै टिमले लगातार खेलमा पराजित हुँदै प्रतियोगिताबाट बाहिरिसकेको छ । सिरहाले ३ खेलमा १ मा जित हात पार्दै २ अंक बटुलेको छ भने इलामले तीनै खेलमा पराजित भएको छ ।



















