एमएम कप क्रिकेट : पुलिसलाई हराउँदै कोशीको विजयी सुरुवात  

Share this
674shares
मुलुकी खबर
मुलुकी खबर
clock२०८२ बैशाख १६, मंगलबार १४:५७

विराटनगर । विभागीय टोली नेपाल पुलिस क्लबलाई हराउँदै कोशी प्रदेश विराटनगरमा जारी तेस्रो मनमोहन स्मृति क्रिकेट प्रतियोगितामा विजयी सुरुवात गरेको छ ।

प्रतियोगिताअन्तर्गत मंगलबार विराटनगरको गिरिजाप्रसाद कोइराला क्रिकेट रंगशालामा भएको समूह ‘बी’ को पहिलो खेलमा कोशीले पुलिसलाई ३७ रनले पराजित गरेको हो ।

कोशीले जितसँगै २ अंक बटुलेको छ । यसअघि समूह ‘ए’ को सबै लिग चरणको खेल सकिएसँगै विभागीय टोली त्रिभुवन आर्मी क्लब फाइनलमा पुगी सकेको छ । आर्मी पहिलो र दोस्रो संस्करण विजेतासमेत हो ।

पुलिसले टस जितेर फिल्डिङ रोज्दै कोशीलाई ब्याटिङको अवसर  दिएको थियो । पहिलो ब्याटिङको मौका पाएको कोशीले खेलमा २९ ओभर ३ बलमा अलआउट हुँदै ९३ रन मात्रै बनाउन सफल भयो । रूपक बरालले २१ रन, मिनास थापा र सुमन गहतराजले समान १५–१५ रन बनाए ।

बलिङमा पुलिसका सुनिल दौल्यालले ५ विकेट तथा विपिन खत्री र चित्र विष्टले २–२ विकेट लिए ।

कोशीले प्रस्तुत गरेको ९४ रनको चुनौती पछ्याउने क्रममा पुलिसले २४ ओभर ५ बलमा अलआउट हुँदै ५६ रनमै समेटियो । पुलिसका कुनै पनि ब्याटर चल्न नसक्दा दोहोरो अंकसम्म बनाउन सकेनन् ।

बलिङमा कोशीका प्रेम कामतले ५ विकेट र प्रकाश कार्कीले ३ विकट लिए । खेलको प्लेयर अफ द म्याच कोशीका प्रेम कामतले ४ हजार रुपैयाँ प्राप्त गरे ।

समूह ‘बी’ को दोस्रो खेल बुधबार कोशी प्रदेश र भारतको आसाम क्लबबीच हुनेछ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.