आईपीएलकाे फाइनलमा पन्जाव, उपाधिका लागि बेंगलुरुसँग खेल्ने

काठमाडौं । पाँचपटकको विजेता मुम्बई इन्डियन्सलाई पराजित गर्दै पञ्जाब किङ्स आईपीएल क्रिकेटको फाइनलमा पुगेको छ । आइतबार भएको दोस्रो क्वालिफायर खेलमा मुम्बईलाई ५ विकेटले हराउँदै पञ्जाब उपाधि नजिक पुगेको हो । अब उपाधिका लागि मंगलबार रोयल च्यालेन्जर्स बेंगलुरुसँग खेल्नेछ ।

मुम्बईले दिएको २०४ रनको लक्ष्य पञ्जाबले १९ ओभरमा ५ विकेटको क्षतिमा पूरा गर्‍यो । कप्तान श्रेयस अय्यरले ४१ बलमा अविजित ८७ रन बनाए । मुम्बईका लागि अश्वनी कुमारले २ विकेट लिँदा ट्रेन्ट बोल्ट र कप्तान हार्दिक पाण्ड्याले १-१ विकेट लिए ।

त्यसअघि टस हारेर पहिले ब्याटिङ गरेको मुम्बईले २० ओभरमा ६ विकेट गुमाएर २०३ रन बनाएको थियो । मुम्बईका लागि तिलक वर्मा र सुर्यकुमार यादवले समान ४४ रन बनाउँदा नमन धिरले ३७ रन बनाए ।

पञ्जाबका अजमतुल्लाह ओमरजाइले २ विकेट लिए भने काइल जेमिसन, मार्कस स्टोइनिस, विजयकुमार वाइशाक र युजभेन्द्र चहलले १-१ विकेट हात पारे ।

पञ्जाब ११ वर्षपछि प्लेअफमा पुगेर फाइनल नै पुगेको हो । यसअघि सन् २०१४ को फाइनलमा पञ्जाब कोलकातासँग पराजित भएको थियो ।