
तिमी बिनाको घर, घरजस्तो छैन
तिमी नहुँदाको भर, भरजस्तो छैन ।
बाटो बिराइ बरालिएर हिँडे कति
तिमी नहुँदाको डर, डरजस्तो छैन ।
प्वाँख हाली बेफिक्री उड्छन् इच्छाहरु
तिमी नहुँदाको रहर, रहरजस्तो छैन ।
झिलिमिली छ परिवेश अनि मौसम
तिमी नहुँदाको सहर, सहरजस्तो छैन ।
जीवन बाँच्नुको अर्थ अरुका लागि पो
तिमी नहुँदाको कर, करजस्तो छैन ।
यायावर जिन्दगीलाई न टेको, न त आड
तिमी नहुँदाको थर, थरजस्तो छैन ।
रातलाई दुःस्वप्नले लघार्छ, लतार्छ
तिमी नहुँदाको प्रहर, प्रहरजस्तो छैन ।



















