
काठमाडौं । मुलुकभर बाढी, पहिरो र डुबानमा परेर मृत्यु हुनेको संख्या २ सय ३९ पुगेको छ ।
बेपत्ता भएकाहरुको शव भेटिने क्रममा छ । अझै १९ जना बेपत्ता छन् । अन्य १ सय ७८ जना घाइते भएको गृह मन्त्रालयका प्रवक्ता ऋषिराम तिवारीले जानकारी दिए। हालसम्म बाढी पहिरो प्रभावित क्षेत्रबाट १७ हजार १ सय २० जनाको उद्धार गरिएको उनको भना छ ।
साथै सहायता परिचालन र अवरुद्ध राजमार्गको मर्मत गरी यातायात सञ्चालन गर्न अथक प्रयास भइरहेको पनि मन्त्रालयका प्रवक्ता तिवारीले बताए । गत शुक्रबार र शनिबारको अविरल वर्षाका कारण आएको बाढी पहिरोले देशका विभिन्न भागमा ठूलो मात्रामा जनधनको क्षति गरेको थियो ।
सयौं परिवार घरबारविहीन भएका छन् । क्षतिग्रस्त भएका विभिन्न सडकमा यातायात सेवा अझै अवरुद्ध छ ।

























