
विराटनगर । कोशी प्रदेश सरकारको न्यूनतम साझा कार्यक्रम सार्वजनिक गरिएकाे छ ।
गत असोज ६ गते गठन भएको कार्यदलले मुख्यमन्त्री हिक्मतकुमार कार्कीलाई बुझाएको साझा कार्यक्रम सरकारले सार्वजनिक गरेकाे हाे । अब बस्ने मन्त्रिपरिषद् बैठकले अनुमोदन गरेपछि न्यूनतम साझा कार्यक्रम कार्यान्यनमा जानेछ ।
मुख्यमन्त्री हिक्मतकुमार कार्कीले कार्यदलले बनाएको साझा कार्यक्रमलाई आधार बनाएर सरकारले काम गर्ने बताए । ८ पेज लामो न्यूनतम साझा कार्यक्रममा क्षेत्रगत रुपमा प्राथमिकता निर्धारण गरिएको छ ।
कार्यदलमा एमालेबाट आर्थिक मामिला तथा योजनामन्त्री रामबहादुर मगर, एमालेका प्रमुख सचेतक रेवतीरमण भण्डारी र प्रदेश सांसद तिलचन पाठक तथा कांग्रेसबाट भौतिक पूर्वाधार विकासमन्त्री भूपेन्द्र राई, कांग्रेस संसदीय दलका उपनेता हिमाल कार्की र कांग्रेसका प्रमुख सचेतक गोपाल तामाङ थिए ।

























