
दाङ । बलात्कारको आरोपमा पक्राउ परेका सशस्त्र प्रहरीका एक जना जवान प्रहरी हिरासतमै मृत फेला परेका छन् ।
प्युठानको सरुमारानी गाउँपालिका–४ घर भइ दाङको ज्वालामाई गण भालुवाङमा कार्यरत सशस्त्र प्रहरी जवान रेवन पचभैया मगर वडा प्रहरी कार्यालय घोराहीको हिरासतमा सोमबार बिहान मृत फेला परेका हुन् ।
आफूले लगाएको गन्जी प्रयोग गरी शौचालयको झ्यालमा रहेको फलामको रडमा झुन्डिएको अवस्थामा शव भेटिएको दाङका प्रहरी प्रमुख एसपी अर्जुन तिमल्सिनाले बताए । उनका अनुसार बलात्कारको आरोपमा अनुसन्धानका लागि मगरलाई पक्राउ गरेर हिरासतमा राखिएको थियो ।
उनले आत्महत्या गरेको हुनसक्ने प्रहरीको प्रारम्भिक अनुमान छ । अनुसन्धानपछि घटनाको वास्तविकता पत्ता लाग्ने एसपी तिमल्सिनाले बताए । उनका अनुसार मगर बिहान ५ बजेतिर शौचालय गएका थिए ।
लामो समयसम्म नफर्किएपछि ढोका खोलेर हेर्दा झुन्डिएर मृत्यु भएको अवस्थामा उनलाई फेला पारिएको प्रहरीले जनाएको छ । गत असोज २४ गते भालुवाङका १४ र ८ वर्षीया दुई बालिकालाई बलात्कार गरेको आरोपमा भालुवाङस्थित सशस्त्र प्रहरी बल ज्वालामाई गणमा कार्यरत दुई जनालाई प्रहरीले पक्राउ गरेको थियो ।
पक्राउ पर्नेमध्ये मगर मृत फेला परेका हुन् । सशस्त्र प्रहरी सहायक हवल्दार भरत रोका मगर हिरासतमै रहेको एसपी तिमल्सिनाले बताए ।

























