
विराटनगर । जिप दुर्घटनामा परेर मंगलबार २ जना महिलाको मृत्यु भएको छ । ९ जना घाइते भएका छन् ।
डडेल्धुराको परशुराम नगरपालिका–९ नौलामा लु १ ज ४५७९ नम्बरको बोलेरो जिप दिउँसो दुर्घटनामा परेको थियो । प्रहरीका अनुसार दुर्घटनामा परशुराम नगरपालिका–९ सल्लेटाकी ४० वर्षीया मोतिदेवी सार्की र आलीताल गाउँपालिका–७ की ३८ वर्षीया धनादेवी बुढाको मृत्यु भएको हो ।
कञ्चनपुरको दैजीदेखि डडेल्धुराको जोगबूढातर्फ गइरहेको जिप दुर्घटनामा परेर ९ जना घाइते भएका छन् । घाइते सबैको महाकाली प्रादेशिक अस्पतालमा उपचार जारी रहेको प्रहरीले जनाएको छ ।
प्रहरीका अनुसार जिपमा १२ जना थिए । चालक सकुशल छन् । प्रहरीले घटनाको अनुसन्धान अघि बढाएको छ ।

























