
विराटनगर । पूर्व–पश्चिम राजमार्गअन्तर्गत मोरङको पथरीशनिश्चरेमा सोमबार साँझ मानवीय क्षति हुने गरी दुर्घटना भएको छ ।
लहरीले मोटरसाइकललाई ठक्कर दिँदा साँझ ७ बजेतिर दुर्घटना भएको मोरङ ट्राफिक प्रमुख इन्स्पेक्टर राजन लम्सालले बताए । उनका अनुसार पश्चिमबाट पूर्वतर्फ जाँदै गरेको एनएल ०१ एडी ५५११ नम्बरको लहरीले पूर्वतर्फ नै जाँदै गरेको प्र–१–०२–०४० प ६०२५ नम्बरको मोटरसाइकललाई ठक्कर दिएको हो ।
पथरीशनिश्चरे नगरपालिका–१ स्थित पश्चिम बस स्टेण्डनजिक दुर्घटना हुँदा मोटरसाइकल चालक सुनसरीको धरान उपमहानगरपालिका–११ का अन्दाजी २० वर्षीय टार्जन राईको मृत्यु भएको ट्राफिक प्रहरीले जनाएको छ । स्थानीयले राईको घटनास्थलमै मृत्यु भएको बताएका छन् ।
तर, प्रहरीले भने उपचारका लागि उर्लाबारीको मंगलबारेस्थित मदन भण्डारी अस्पताल एवं ट्रमा सेन्टर पुर्याउनसाथ साँझ ७ः१५ बजेतिर चिकित्सकले मृत घोषित गरेको जनाएको छ । शवलाई पोस्टमार्टमका लागि अस्पतालमै राखिएको छ ।
दुर्घटनालगत्तै प्रहरीले लहरी र चालक भारतको उत्तर प्रदेश मिर्जयापुर बस्ने ४२ वर्षीय दिनेशकुमार दासलाई नियन्त्रणमा लिएको छ । दुर्घटना हुनुको कारण पत्ता नलागेको र थप अनुसन्धान सुरु गरिएको प्रहरीले जनाएको छ ।

























